ഓർച്ചയും ചേർച്ചയും കല്ല്യോട്ട് ഗവ:ഹയർ സെക്കൻഡറി സ്കൂളിലെ പൂർവ്വവിദ്യാർത്ഥികൾ 32 വർഷത്തിനുശേഷം ഒത്തുകൂടി

കല്ല്യോട്ട് ഗവ:ഹയർ സെക്കൻഡറി സ്കൂളിൽ നിന്നും 1989-90 അധ്യായന വർഷത്തിൽ എസ്.എസ്.എൽ.സി പഠനം പൂർത്തീകരിച്ച വിദ്യാർത്ഥികൾ 32 വർഷത്തിനുശേഷം ഓർച്ചയും ചേർച്ചയും എന്ന പേരിൽ വീണ്ടും ഒത്തുകൂടി. നീണ്ട നാളത്തെ കാത്തിരിപ്പിന് വിരാമമിട്ട് പരസ്പരം കണ്ടുമുട്ടിയപ്പോൾ സുഖദു:ഖസമ്മിശ്രവും കുസൃതിത്തരങ്ങൾ നിറഞ്ഞതുമായ ബാല്യകാല സ്കൂൾ ജീവിതം വീണ്ടും അയവിറക്കപ്പെട്ടു. ആദ്യഘട്ടമെന്ന നിലയിൽ സംഗമത്തിൽ പൂർവ്വ വിദ്യാർത്ഥികൾ മാത്രമാണ് പങ്കാളികളായത്. വരും വർഷത്തിൽ വിപുലമായ രീതിയിൽ അധ്യാപകരേയും കുടുംബാംഗങ്ങളെയും പങ്കെടുപ്പിച്ച് സംഗമം നടത്താൻ തീരുമാനിച്ചു. പുന:സമാഗമം സ്കൂൾ പ്രിൻസിപ്പാൾ ലോഹിതാക്ഷൻ മാസ്റ്റർ ഉദ്ഘാടനം ചെയ്തു.മുഖ്യാതിഥിയായി പി.ടി.എ പ്രസിഡന്റ് പുരുഷോത്തമൻ പങ്കെടുത്തു.ജോൺസൺ പി.എം അധ്യക്ഷത വഹിച്ച പരിപാടിയിൽ ടി.കെ.നാരായണൻ സ്വാഗതവും ബിനോയി കുര്യൻ നന്ദിയും പറഞ്ഞു.സംഗമത്തിൽ വിദേശ രാജ്യങ്ങളിലും കേരളത്തിനു വെളിയിലും ജോലി ചെയ്യുന്നവരുൾപ്പെടെ 36 അംഗങ്ങൾ പങ്കെടുത്തു.