അകന്നു കഴിയുന്ന ഭാര്യയെയും കൊച്ചുമകളെയും കിടപ്പുമുറിയിലേയ്ക്ക് പെട്രോൾ ഒഴിച്ച് തീകൊളുത്തി കൊല്ലാൻ ശ്രമം...സംഭവം പാണത്തൂരിൽ

കാസർകോട് : അകന്നു കഴിയുന്ന ഭാര്യയെയും കൊച്ചുമകളെയും കിടപ്പുമുറിയിലേയ്ക്ക് പെട്രോൾ ഒഴിച്ച് തീകൊളുത്തി കൊല്ലാൻ ശ്രമം. ഇരുവരും ഭാഗ്യത്തിനു രക്ഷപ്പെട്ടു. അതേസമയം അക്രമം നടത്തിയ ഭർത്താവിനെ പൊള്ളലേറ്റ നിലയിൽ ജില്ലാ ആശുപത്രിയിൽ പ്രവേശിപ്പിച്ചു. പാണത്തൂർ, നെല്ലിക്കുന്നിലെ ജോസഫ് (65) ആണ് ആശുപ്രതിയിലായത്. വ്യാഴാഴ്ച രാത്രി 10.30മണിയോടെയാണ് സംഭവം. ഇതേ കുറിച്ച് പൊലീസ് പറയുന്നത് ഇങ്ങനെ:"ജോസഫും ഭാര്യ സിസിലിയും വർഷങ്ങളായി അകന്നു കഴിയുന്നവരാണ്. സിസിലിയും മകൻ ഷാജിയും അയാളുടെ ഭാര്യയും കൊച്ചുമകളായ ആറുവയസുകാരിയുമാണ് വീട്ടിൽ താമസം. വ്യാഴാഴ്ച രാത്രി സിസിലിയും കൊച്ചുമകളും കിടന്നുറങ്ങിയിരുന്ന മുറിയുടെ ജനൽ വഴി അകത്തേയ്ക്ക് പെട്രോൾ ഒഴിച്ച് തീകൊളുത്തുകയായിരുന്നു. തീ ആളിപ്പടർന്നതോടെ ഇരുവരും പുറത്തേയ്ക്ക് ഓടി രക്ഷപ്പെട്ടു. ഇതിനിടയിൽ അക്രമം നടത്തിയ ജോസഫിനു പൊള്ളലേറ്റു. ബഹളവും നിലവിളിയും കേട്ട് ഓടിക്കൂടിയ നാട്ടുകാരും പാണത്തൂർ എയ്ഡ് പോസ്റ്റിൽ ഉണ്ടായിരുന്ന പൊലീസുകാരും സ്ഥലത്തെത്തി തീയണച്ചു. കിടക്കയും ജന്നലും കത്തി നശിച്ചു. പൊലീസാണ് പരിക്കേറ്റ ജോസഫിനെ ആശുപത്രിയിൽ എത്തിച്ചത്”. സംഭവത്തിൽ രാജപുരം പൊലീസ് അന്വേഷണം തുടങ്ങി.