സമ്മാനം അടിച്ചതറിയാതെ നിരാശയിൽ കീറിയെറിഞ്ഞത് 5 ലക്ഷം രൂപ നേടിയ ലോട്ടറി ടിക്കറ്റ്
കാസര്‍കോട് : ഭാഗ്യം പരീക്ഷിക്കാൻ എടുത്ത ടിക്കറ്റിൽ ഭാഗ്യം തെളിഞ്ഞില്ലെന്ന നിരാശയിൽ കീറിയെറിഞ്ഞപ്പോൾ ചെങ്കള ചൂരിപ്പള്ളത്തെ മന്‍സൂര്‍ അലി അറിഞ്ഞില്ല കൈയിൽ നിന്നു പോയത് ഒരു നിധിയാണെന്ന്.
ഓട്ടോ ഡ്രൈവറായ മൻസൂർ എടുത്ത വിന്‍വിന്‍ ലോട്ടറിയുടെ രണ്ടാം സമ്മാനമായ 5 ലക്ഷം സമ്മാനം അടിച്ചിരുന്നു. ലോട്ടറി ഫലം നോക്കിയതാകട്ടെ പട്ടികയുടെ താഴെയും.
ഇതോടെ നിരാശനായി കയ്യിലുണ്ടായിരുന്ന മൂന്നു ടിക്കറ്റുകളും കീറിയെറിഞ്ഞു. ഒരു മണിക്കൂര്‍ കഴിഞ്ഞ് ഏജന്റ് വന്നു പറഞ്ഞപ്പോഴാണ് സമ്മാനമുള്ള കാര്യം അറിയുന്നത്.
ലോട്ടറി ടിക്കറ്റ് കീറി പല കഷ്ണങ്ങളായിപ്പോയതിനാല്‍ ഇനി അതിലെ നമ്പര്‍ നോക്കി സമ്മാനം നല്‍കാനാവില്ല.
ജില്ലാ ലോട്ടറി ഓഫിസില്‍ ചെന്നപ്പോള്‍ എംഎല്‍എയുടെ കത്തുമായി സംസ്ഥാന ഭാഗ്യക്കുറി ഡയറക്ടര്‍ക്ക് നിവേദനം കൊടുക്കാന്‍ പറഞ്ഞു.
ടിക്കറ്റ് കൂട്ടിച്ചേര്‍ത്ത ശേഷം അതിലെ ക്യുആര്‍ കോഡ് സ്‌കാന്‍ ചെയ്യാന്‍ പറ്റിയെങ്കില്‍ സമ്മാനം ലഭിക്കും. അല്ലാത്ത പക്ഷം സംസ്ഥാന ഭാഗ്യക്കുറി ഡയറക്ടറുടെ പ്രത്യേക തീരുമാനം വേണ്ടിവരും. .
No comments