മഴക്കാല രോഗങ്ങൾക്കെതിരെ ജാഗ്രത പാലിക്കണം : ജില്ലാ മെഡിക്കൽ ഓഫീസർ

കാസർകോട്: മഴക്കാല ആരംഭത്തോടു  കൂടി പകർച്ചവ്യാധി വ്യാപന സാധ്യത വർധിക്കാൻ ഇടയുള്ളതിനാൽ പ്രതിരോധ പ്രവർത്തനങ്ങൾ ഊർജിതപ്പെടുത്തണമെന്ന് ജില്ലാ മെഡിക്കൽ ഓഫീസർ (ആരോഗ്യം ) ഡോ എ. വി രാംദാസ് അറിയിച്ചു.പകർച്ചവ്യാധി നിയന്ത്രണ പ്രവർത്തനങ്ങൾ ഓരോരുത്തരും സ്വയം ഏറ്റെടുക്കുന്നതോടൊപ്പം, പനി ലക്ഷണങ്ങൾ കാണിക്കുന്നവർ സ്വയം ചികിത്സ നടത്താതെ നിർബന്ധമായും ആരോഗ്യ സ്ഥാപനങ്ങളിൽ ചികിത്സ തേടണമെന്നും അറിയിച്ചു.

രോഗപ്രതിരോധ പ്രവർത്തനങ്ങളുടെ ഭാഗമായി 

 ഇവ ശ്രദ്ധിക്കാം 

·         കൊതുകുകൾ പെരുകുന്നത് തടയാൻ വെള്ള ക്കെട്ടുകൾ ഒഴിവാക്കി

ഉറവിട നശീകരണം ഫലപ്രദമായി ചെയ്യുക

·         വെള്ളം ശേഖരിച്ചുവെക്കുന്ന പാത്രങ്ങൾ അട ച്ചുസൂക്ഷിക്കുക.

·         ആഴ്ചയിൽ ഒരുദിവസം ഡ്രൈഡേ ആചരിക്കുക

·         വീടുകളിലെ ഇൻഡോർ പ്ലാൻ്റുകളുടെ വെള്ളം ആഴ്ചയിൽ ഒരുദിവസം നിർബന്ധമായും മാറ്റുക

·         കൊതുക് കടി ഏൽക്കാതിരിക്കാനാവശ്യമായ ലേപനങ്ങളോ വലയോ ഉപയോഗിക്കുക

·         തിളപ്പിച്ചാറ്റിയ വെള്ളം മാത്രം കുടിക്കാനും പാചകത്തിനും   ഉപയോഗിക്കുക

·         കിണറുകൾ ക്ലോറിനേറ്റ് ചെയ്യുക,

·        ഭക്ഷണം കഴിക്കുന്നതിന് മുമ്പും ശേഷവും കൈകൾ കഴുകുക

·        മലമൂത്ര വിസർജന ശേഷം കൈകാലുകൾ കഴുകുക

·        പൊതു ടാപ്പുകളും കിണറുകളും വൃത്തിയായി സൂക്ഷിക്കുക

·        എലി പെറ്റുപെരുകുന്ന സാ ഹചര്യം ഒഴിവാക്കുക.

     തൊഴിലുറപ്പ് തൊഴിലാളികൾ, കർഷകത്തൊഴിലാളികൾ, തെങ്ങുകയറ്റ തൊഴിലാളികൾ, മൃഗപരിപാലകർ, ശുചീകരണ തൊഴിലാളികൾ, നിർമാണ തൊഴിലാളികൾ  തുടങ്ങി മലിനജല സമ്പർക്ക സാധ്യതയുള്ള തൊഴിൽ ചെയ്യുന്നവർ  ആഴ്ചയിൽ ഒരിക്കൽ ഡോക്സിസൈക്ലിൻ-200 മില്ലി ഗ്രാം ഗുളിക ആരോഗ്യപ്രവർത്തകരുടെ  നിർദേശപ്രകാരം കഴിച്ചാൽ എലിപ്പനി രോഗസാധ്യത തടയാനാകും.