പുലിഭീതി ... വനം വകുപ്പിന്റെ ഓഫീസിലേക്ക് നൈറ്റ് മാർച്ച് നടത്തി

ഇരിയണ്ണി : വന്യമൃഗശല്യം ശാശ്വതമായി പരിഹരിക്കുക, പുലിഭീതിയിൽ നിന്ന് ജനങ്ങളുടെ ജീവന് സുരക്ഷിതത്വം ഉറപ്പാക്കുക, കാർഷിക വിളകൾക്ക് സംരക്ഷണം ഉറപ്പു വരുത്തുക, നൈറ്റ് പട്രോളിങ് ശക്തമാക്കുക എന്നീ ആവശ്യങ്ങളുമായി കർഷകസംഘം ഇരിയണ്ണി വില്ലേജ് കമ്മിറ്റി ബോവിക്കാനത്തെ കാറഡുക്ക വനം സെക്ഷൻ ഓഫീസിലേക്ക് നൈറ്റ് മാർച്ച് നടത്തി. പ്രകടനത്തിൽ നൂറുകണക്കിനാളുകൾ പങ്കെടുത്തു. മാർച്ച് കർഷകസംഘം ജില്ലാ പ്രസിഡന്റ് കെ കുഞ്ഞിരാമൻ ഉദ്ഘാടനം ചെയ്തു. കെ വി സജേഷ് അധ്യക്ഷനായി. സിപിഐ എം ഏരിയാ സെക്രട്ടറി എം മാധവൻ, ഇ മോഹനൻ, എ വിജയകുമാർ, പി വി മിനി, പി ബാലകൃഷ്ണൻ, ബി കെ നാരായണൻ, കെ പ്രഭാകരൻ എന്നിവർ സംസാരിച്ചു. വി വാസു സ്വാഗതം പറഞ്ഞു. മാർച്ചിനുശേഷം വനം വകുപ്പ് ഉദ്യോഗസ്ഥരുമായി കർഷകസംഘം നേതാക്കൾ ചർച്ച നടത്തി. കൂടുതലായി ഒരു വാഹനം കൂടി പട്രാളിങ്ങിന് നൽകാനും ജനങ്ങളുടെ സുരക്ഷയ്ക്ക് കൂടുതൽ സംവിധാനം നൽകാൻ ഇടപെടൽ നടത്തുമെന്ന് ഉദ്യോഗസ്ഥർ ഉറപ്പ് നൽകി. പുലി ഭീതി നീക്കാൻ ശക്തമായ നടപടി സ്വീകരിച്ചില്ലെങ്കിൽ കൂടുതൽ ശക്തമായ സമരം
സംഘടിപ്പിക്കേണ്ടിവരുമെന്ന് കർഷകസംഘം ഏരിയാ സെക്രട്ടറി ഇ മോഹനൻ, പ്രസിഡന്റ് എ വിജയകുമാർ എന്നിവർ പറഞ്ഞു.