ബളാൽ ഇനി ഹരിതസമൃദ്ധി പഞ്ചായത്ത്
വെള്ളരിക്കുണ്ട്: സുഭിക്ഷകേരളം പദ്ധതിയുടെ വിജയത്തിന്റെ ചുവടുപിടിച്ച് ബളാല് പഞ്ചായത്ത് തരിശുരഹിത ഹരിതസമൃദ്ധി പഞ്ചായത്തായി പ്രസിഡന്റ് എം.രാധാമണി പ്രഖ്യാപിച്ചു. സുഭിക്ഷ കേരളം പദ്ധതിയുടെ ഭാഗമായി പഞ്ചായത്തില് തരിശായി കണ്ടെത്തിയ 33.94 ഹെക്ടര് ഭൂമിയില് 22 ഹെക്ടര് ഭൂമിയില് കൃഷി ചെയ്യുകയും 11.94 ഹെക്ടര് ഭൂമി കൃഷി ചെയ്യുന്നതിന് വേണ്ടുന്ന നടീല് വസ്തുക്കള് ലഭ്യമാക്കുകയും ചെയ്തതിലൂടെയാണ് തരിശുരഹിത പഞ്ചായത്തെന്ന് പ്രഖ്യാപിക്കുവാന് സാധിച്ചത്.പഞ്ചായത്തിലെ 16 വാര്ഡുകളിലും ഉള്ള എല്ലാ വീടുകളിലും പച്ചക്കറി, കിഴങ്ങുവര്ഗ കൃഷി ഉറപ്പുവരുത്തി. ഇപ്രകാരം പ്രഖ്യാപനം ചെയ്യപ്പെടുന്ന ബ്ലോക്കിലെ ആദ്യ പഞ്ചായത്ത് കൂടിയാണ് ബളാല്. യോഗത്തില് പഞ്ചായത്ത് വൈസ്പ്രസിഡന്റ് രാജു കട്ടക്കയം അധ്യക്ഷതവഹിച്ചു. കൃഷി ഓഫീസര് അനില് സെബാസ്റ്റ്യന്, സെക്രട്ടറി കെ.പി.റാഷിദ് എന്നിവര് പ്രസംഗിച്ചു.
No comments