കൂലി നൽകിയില്ല; മുതലാളിയുടെ ഒരു കോടിയുടെ ബെൻസ് കത്തിച്ച് യുവാവ്
നോയിഡ: ചെയ്ത തൊഴിലിന് കൂലി നല്‍കാത്തതിന്റെ പേരില്‍ മുതലാളിയുടെ ഒരു കോടിയുടെ ബെന്‍സ് കത്തിച്ച് യുവാവ്. നോയിഡ് സെക്ടര്‍ 45ല്‍ കഴിഞ്ഞദിവസമാണ് സംഭവം. സംഭവത്തിന്റെ ദൃശ്യങ്ങള്‍ സോഷ്യല്‍മീഡിയയില്‍ പ്രചരിച്ചതോടെ രണ്‍വീര്‍ എന്ന യുവാവിനെ പൊലീസ് അറസ്റ്റ് ചെയ്തു.അതി സമ്പന്നയായ ബെന്‍സ് ഉടമയുടെ വീട്ടില്‍ രണ്‍വീര്‍ ടൈല്‍ ജോലി ചെയ്തിരുന്നു. ജോലി മുഴുവന്‍ പൂര്‍ത്തിയായെങ്കിലും രണ്ട് ലക്ഷത്തോളം രൂപ വേതനയിനത്തില്‍ രണ്‍വീറിന് ഉടമ നല്‍കാനുണ്ടായിരുന്നു. പണം ചോദിച്ച് മാസങ്ങളോളം കൂടിക്കാഴ്ച നടത്തിയെങ്കിലും നല്‍കാന്‍ ഉടമ തയ്യാറായില്ല. ഇതോടെ പ്രകോപിതനായ രണ്‍വീര്‍ ബെന്‍സിന് തീയിടാന്‍ തീരുമാനിക്കുകയായിരുന്നു.
തുടര്‍ന്ന് ഞായറാഴ്ച ഉടമയുടെ വീട്ടിലെത്തിയ രണ്‍വീര്‍ പെട്രോള്‍ ഉപയോഗിച്ച് കാറിന് തീ കൊളുത്തുകയായിരുന്നു. ഹെല്‍മറ്റ് ധരിച്ച് രണ്‍വീര്‍ ബെന്‍സിന് സമീപത്ത് എത്തുന്നതും തീയിട്ട ശേഷം തിരികെ പോകുന്നതും സിസി ടിവിയില്‍ വ്യക്തമായിരുന്നു. പിന്നാലെ പരാതിയുമായി ഉടമ പൊലീസിന് സമീപിക്കുകയും അറസ്റ്റ് ചെയ്യുകയുമായിരുന്നു. അതേസമയം, രണ്‍വീറിന്റെ ആരോപണങ്ങള്‍ തള്ളി കാറുടമയുടെ കുടുംബം രംഗത്തെത്തി. 2019-2020 കാലയളവിലാണ് രണ്‍വീര്‍ ടൈല്‍ ജോലി ചെയ്തത്. 12 വര്‍ഷത്തോളമായി അറിയാവുന്ന വ്യക്തിയാണ് രണ്‍വീര്‍. കുടുംബത്തിലെ അംഗത്തെ പോലെയായിരുന്നു കണ്ടിരുന്നത്. കൊവിഡ് സമയത്ത് തന്നെ അദ്ദേഹത്തിനുള്ള രണ്ട് ലക്ഷം രൂപ കൈമാറിയിരുന്നെന്ന് കുടുംബത്തിലെ അംഗമായ ആയുഷ് ചൗഹാന്‍ പറഞ്ഞു.
No comments