‘അങ്ങനെ അതുറപ്പിച്ചു’; നടൻ രാജേഷ് മാധവൻ വിവാഹിതനാകുന്നു കാസർകോഡ് കൊളത്തൂർ സ്വദേശിയാണ് രാജേഷ്

നടനും കാസ്റ്റിങ് ഡയറക്ടറും സംവിധായകനുമായ രാജേഷ് മാധവൻ വിവാഹിതനാകുന്നു. ദീപ്തി കാരാട്ട് ആണ് വധു. ഏറെ നാളത്തെ പ്രണയത്തിന് ശേഷമാണ് ഇരുവരുടെയും വിവാഹം. 'ന്നാ താൻ കേസ് കൊട്' എന്ന ചിത്രത്തിന്റെ അസ്സോസിയേറ്റ് ഡയറക്ടർമാരിൽ ഒരാളായിരുന്നു ദീപ്തി.


ദീപ്തിക്കും രാജേഷിനും സഹപ്രവർത്തകരും സുഹൃത്തുക്കളുമടക്കം നിരവധി പേർ സമൂഹ മാധ്യമങ്ങളിലെത്തി ആശംസകൾ അറിയിച്ചു. ‘അങ്ങനെ അതുറപ്പിച്ചു’ എന്ന അടിക്കുറിപ്പോടെയാണ് ഇരുവരുടെയും ചിത്രങ്ങൾ ഇവർ പങ്കുവച്ചത്.

കാസർകോഡ് കൊളത്തൂർ സ്വദേശിയാണ് രാജേഷ്. ടെലിവിഷൻ പരിപാടികളുടെ അമരക്കാരനായി കരിയർ ആരംഭിച്ച രാജേഷ് അപ്രതീക്ഷിതമായാണ് സിനിമയിൽ എത്തുന്നത്. സനൽ അമന്റെ 'അസ്തമയം വരെ' എന്ന ചിത്രത്തിൽ പ്രൊഡക്‌ഷൻ കൺട്രോളറായിട്ടാണ് രാജേഷിന്റെ തുടക്കം.


'മഹേഷിന്റെ പ്രതികാരം' എന്ന ചിത്രത്തിലെ ചെറിയ വേഷത്തിലൂടെയാണ് രാജേഷ് അഭിനയത്തിൽ അരങ്ങേറ്റം കുറിക്കുന്നത്. പിന്നീട് ഫഹദ് ഫാസിൽ നായകനായ 'തൊണ്ടിമുതലും ദൃക്സാക്ഷിയും' എന്ന ചിത്രത്തിൽ അസിസ്റ്റന്റ് ഡയറക്ടറായി ജോലി ചെയ്തു.


സിനിമയിൽ ശ്രദ്ധേയമായ വേഷങ്ങൾ കൈകാര്യം ചെയ്ത രാജേഷ് പല സിനിമകളുടെയും കാസ്റ്റിങ് ഡയറക്റ്ററായും പ്രവർത്തിച്ചിട്ടുണ്ട്. സംസ്ഥാന സർക്കാരിന്റെ രണ്ടാം മികച്ച ചിത്രമായ 'തിങ്കളാഴ്‌ച നിശ്ചയ'മെന്ന സിനിമയുടെ കാസ്റ്റിങ് നിർവഹിച്ചത് രാജേഷ് മാധവനും വിനീത് വാസുദേവനും ചേർന്നാണ്. 'ന്നാ താൻ കേസ് കൊട്' എന്ന ചിത്രത്തിന്റെ കാസ്റ്റിങ് ഡയറക്ടറും രാജേഷ് ആയിരുന്നു. ഈ ചിത്രത്തിൽ രാജേഷ് അവതരിപ്പിച്ച സുരേശൻ എന്ന കഥാപാത്രം വൻ ജനപ്രീതി നേടിയിരുന്നു.