ബളാൽ, രാജപുരം ജില്ലാ പഞ്ചായത്ത് റോഡ് PWDക്ക് വിട്ടുകൊടുക്കണം ; താലൂക്ക് വികസന സമിതി യോഗം

ബളാൽ രാജപുരം  ജില്ലാ പഞ്ചായത്ത് റോഡ് PWD ക്ക് വിട്ടുകൊടുത്തു C R I F മുഖേന റോഡ് വികസിപ്പിക്കാനുള്ള സാഹചര്യം ഒരുക്കണമെന്ന് താലൂക്ക് വികസന സമിതി യോഗം ആവശ്യപ്പെട്ടു. കള്ളാർ, പനത്തടി ബളാൽ പഞ്ചായത്തുകളിലെ വിവിധ പ്രദേശങ്ങളിൽ നിന്ന് വെള്ളരിക്കുണ്ട് താലൂക്കിക്ക് ആസ്ഥാനത്തിലേക്ക് ജനങ്ങൾക്ക് എത്തിച്ചേരുവാൻ കൂടുതൽ ബസ് റൂട്ടുകൾ എത്തിച്ചേരുന്ന വിധത്തിൽ പത്തര കിലോമീറ്റർ ദൈർഘത്തിലുള്ള റോഡ് വികസിപ്പിക്കേണ്ടതുണ്ട്. നിലവിൽ ഒടയൻചാൽ വഴി 40 ഓളം കിലോമീറ്റർ ചുറ്റിയാണ് താലൂക്ക് ആസ്ഥാനത്തേക്ക് എത്തേണ്ടത്. വലിയ കയറ്റവും വളവും  ഉള്ള ബളാൽ രാജപുരം  റോഡ് പൊതുമരാമത്തിന് കൈമാറിയാൽ സംസ്ഥാന ഗവൺമെന്റിന് തീർത്തും ബാധ്യത വരുത്താതെ C R I F മുഖേന ഗതാഗത യോഗ്യമാക്കാൻ സാധിക്കും. പ്രസ്തുത കാര്യങ്ങൾ ചൂണ്ടിക്കാട്ടി ബാബു കോഹിനൂർ പ്രമേയം അവതരിപ്പിച്ചു. ടിപി തമ്പാൻ പിൻതാങ്ങി.

ഫെബ്രുവരി മാസത്തിലെ വികസന സമിതി യോഗത്തിൽ ഏഴ് പഞ്ചായത്ത് പ്രസിഡണ്ടുമാർ, ജില്ലാ പഞ്ചായത്ത് മെമ്പർമാർ  എത്താത്തതിൽ യോഗം ഉത്കണ്ഠ രേഖപ്പെടുത്തി.

വെള്ളരിക്കുണ്ട് ട്രാഫിക് പരിഷ്കരണത്തിനായി റെഗുലേറ്ററി കമ്മിറ്റി ചേർന്നിട്ടുള്ളതാണെന്നും ഉടൻ നടപടിക്രമം പൂർത്തിയാക്കുമെന്നും ബളാൽ പഞ്ചായത്ത് സെക്രട്ടറി അറിയിച്ചു. കോട്ടഞ്ചേരി വനസംരക്ഷണ സമിതിക്ക് രജിസ്ട്രേഷൻ അനുവദിച്ച വിവരവും  ടൂറിസവുമായി ബന്ധപ്പെട്ട് ഡീറ്റെയിൽ പ്രോജക്ട് റിപ്പോർട്ട് തയ്യാറാക്കുന്നതിനായി ഓഫീസറും ഡിവിഷനൽ ഫോറസ്റ്റ് ഓഫീസറും അനുബന്ധ ഉദ്യോഗസ്ഥരും സ്ഥലം പരിശോധന നടത്തിയ കാര്യവും ഫോറസ്റ്റ് ഉദ്യോഗസ്ഥർ  യോഗത്തിൽ അറിയിച്ചു. കോളിച്ചാൽ ചെറുപുഴ മലയോര ഹൈവേയുടെ വനഭൂമിയിൽ കൂടി കടന്നു പോകുന്ന ഭാഗം കൂടി ഉൾപ്പെടുത്തിയിട്ടുള്ള റിവൈസ് എസ്റ്റിമേറ്റ് അംഗീകാരത്തിനായി സമർപ്പിച്ചിട്ടുണ്ടെന്നും K R F B എക്സിക്യൂട്ടീവ് എഞ്ചിനീയർ അറിയിച്ചു. യോഗത്തിൽ ബളാൽ പഞ്ചായത്ത് സ്റ്റാൻഡിങ് കമ്മിറ്റി ചെയർമാൻ അബ്ദുൾ ഖാദർ അധ്യക്ഷത വഹിച്ചു ടിപി തമ്പാൻ, എൻ പുഷ്പരാജൻ, ബാബു കോഹിനൂർ, എ സി എ ലത്തീഫ്, ബിജു തുളിശ്ശേരി, പ്രിൻസ് ജോസഫ്, ബെന്നി നാഗമറ്റം, തഹസിൽദാർ പിവി മുരളി  വിവിധ വകുപ്പ് തല ഉദ്യോഗസ്ഥർ പങ്കെടുത്തു.