ആൾട്ടോ കാറിൽ കടത്താൻ ശ്രമിച്ച 272.16 ലിറ്റർ കർണാടക നിർമിത മദ്യം കാസർഗോഡ് വെച്ച് പിടികൂടി

കാസർകോട്: ഓണം ലക്ഷ്യമാക്കി സംസ്ഥാനത്തേയ്ക്ക് വൻതേതിൽ മദ്യമെത്തുന്നതായി വിവരം. ശനിയാഴ്ച വൈകീട്ട് അടുക്കത്ത് ബയലിൽ നടന്ന വൻ സ്പിരിറ്റ് വേട്ടക്ക് പിന്നാലെ എക്സൈസ് ചൗക്കിയിൽ മദ്യക്കടത്ത് പിടികൂടി. ആൾട്ടോ കാറിൽ കടത്താൻ ശ്രമിച്ച 272.16 ലിറ്റർ കർണാടക നിർമിത മദ്യമാണ് പിടികൂടിയത്. രാത്രി ഒമ്പതരയോടെ കാസർകോട് എക്സൈസ് എൻഫോഴ്സ്മെന്റ് ആന്റ് ആന്റി നർക്കോട്ടിക് സ്പെഷ്യൽ സ്ക്വാഡും, കാസർകോട് എക്സൈസ് സർക്കിൾ ഓഫീസിലെ ഉദ്യോഗസ്ഥരും സംയുക്തമായി നടത്തിയ പരിശോധനയിലാണ് മദ്യക്കടത്ത് പിടികൂടിയത്. ആരിക്കാടിയിൽ നടത്തിയ പരിശോധനക്കിടെ നിർത്താതെ പോയ, കാറിനെ പിന്തുടർന്ന് ചൗക്കിയിൽ വച്ച് സാഹസികമായി തടഞ്ഞുവയ്ക്കുകയായിരുന്നു. അതിനിടെ ഡ്രൈവർ ഓടിപ്പോയെന്ന് എക്സ് അധികൃതർ പറഞ്ഞു. കേസ് രേഖകളും തൊണ്ടി സാധനങ്ങളും വാഹനവും സഹിതം തുടർ നടപടികൾക്കായി കാസർകോട് റേഞ്ച് ഓഫീസിൽ ഹാജരാക്കി.

എക്സൈസ് എൻഫോഴ്സ്മെന്റ് ആന്റ് ആന്റി നർക്കോട്ടിക് സ്പെഷ്യൽ സ്ക്വാഡിലെ അസിസ്റ്റന്റ് എക്സൈസ് ഇൻസ്പെക്ടർ(ഗ്രേഡ്) വി പ്രമോദ് കുമാറിന്റെ നേതൃത്വത്തിലാണ് ദേശീയപാതയിൽ പരിശോധന നടന്നത്. അസിസ്റ്റന്റ് എക്സൈസ് ഇൻസ്പെക്ടർ(ഗ്രേഡ്) എംവി സുധീന്ദ്രൻ, പ്രിവന്റീവ് ഓഫീസർ(ഗ്രേഡ്)മാരായ കെആർ പ്രജിത്ത്, കെ ജിതേന്ദ്രൻ, സിവിൽ എക്സൈസ് ഓഫീസർമാരായ വി മഞ്ജുനാഥൻ, ടിവി അതുൽ സോനു സെബാസ്റ്റ്യൻ, സി സിജിൻ, വനിത സിവിൽ എക്സൈസ് ഓഫീസർ വി റീന, ഡ്രൈവർ കെ സത്യൻ എന്നിവരും പരിശോധക സംഘത്തിലുണ്ടായിരുന്നു.