ലോകത്ത് ആദ്യം: കോവിഡ് പരിശോധനയ്ക്ക് പേപ്പര്‍ സ്ട്രിപ് കിറ്റുമായി ഇന്ത്യന്‍ ഗവേഷകര്‍

ന്യൂഡൽഹി: ഇന്ത്യൻ ഗവേഷകർ വികസിപ്പിച്ച പേപ്പർ സ്ട്രിപ്പ് കോവിഡ് ടെസ്റ്റിങ് കിറ്റ് വിപ്ളവം സൃഷ്ടിക്കാനൊരുങ്ങുന്നു. ഇന്ത്യൻ ബഹുരാഷ്ട്ര കമ്പനിയായ ടാറ്റയുടെ കീഴിൽ പ്രവർത്തിക്കുന്ന ഗവേഷകരാണ് ഈ കിറ്റ് വികസിപ്പിച്ചത്. ഏകദേശം 500 രൂപ മാത്രം ചെലവ് വരുന്ന പേപ്പർ സ്ട്രിപ്പിന് ഫെലുദ എന്നാണ് പേരിട്ടിരിക്കുന്നത്.ജീൻ എഡിറ്റിങ്ങിന് ഉപയോഗിക്കുന്ന ക്രിസ്പർ ടെക്നോളജി അടിസ്ഥാനമാക്കിയാണ് ഈ കിറ്റ് വികസിപ്പിച്ചത്. ഡൽഹി ആസ്ഥാനമായ സിഎസ്ഐആർ- ഇൻസ്റ്റിറ്റ്യൂട്ട് ഓഫ് ജീനോമിക് ആൻഡ് ഇന്റഗ്രേറ്റീവ് ബയോളജി എന്ന സ്ഥാപനത്തിലെ ഗവേഷകരാണ് കിറ്റിന് പിന്നിൽ.

സ്വകാര്യ ലാബുകളിൽ അടക്കം 2,000 ആളുകളിൽ ഈ സ്ട്രിപ്പ് ഉപയോഗിച്ച് പരിശോധന നടത്തി. കൂട്ടത്തിൽ നേരത്തെ തന്നെ കോവിഡ് പോസിറ്റീവായ ആളും ഉൾപ്പെട്ടിരുന്നു. ഈ പരീക്ഷണത്തിൽ ഫെലുദ കിറ്റ് 98 ശതമാനത്തോളം കൃത്യത പുലർത്തുന്നുവെന്നും 96 ശതമാനത്തോളം സംവേദനക്ഷമതയും പുലർത്തുന്നുവെന്നും തെളിഞ്ഞുവെന്നാണ് ഗവേഷകർ അവകാശപ്പെടുന്നത്.പരീക്ഷണത്തിൽ കോവിഡ് ബാധയുള്ള മിക്കവരെയും ഇതിലൂടെ തിരിച്ചറിയാൻ സാധിച്ചുവെന്നും ഇവർ പറയുന്നു. തെറ്റായ റിസൾട്ടുകൾ ഈ കിറ്റിൽ അധികം ഉണ്ടാകില്ല. ലളിതവും കൃത്യവുമായ റിസൾട്ട് ലഭിക്കുമെന്നും കേന്ദ്രസർക്കാരിന്റെ ശാസ്ത്ര ഉപദേശകൻ പ്രൊഫ. കെ. വിജയ് രാഘവൻ പറഞ്ഞു.

ലോകത്തിലെ ആദ്യത്തെ പേപ്പർ സ്ട്രിപ്പ് ഉപയോഗിക്കുന്ന കോവിഡ് ടെസ്റ്റിങ് കിറ്റാണ് ഗവേഷകർ വികസിപ്പിച്ചത്. ഇതിന് വിപണിയിലിറക്കാനുള്ള അംഗീകാരം ലഭിച്ചുവെന്നാണ് വിവരം.