വിജ്ഞാനസമ്പദ്ഘടനയിലേക്ക് ചുവടുവയ്ക്കാൻ കാസർഗോഡ് ജില്ലാ പഞ്ചായത്ത്
കാസര്‍കോട് ; സംസ്ഥാന സര്‍ക്കാരിന്റെ സ്വപ്ന പദ്ധതിയായ വിജ്ഞാന സമ്പദ്ഘടനയ്ക്കും സ്ത്രീ ശാക്തീകരണത്തിനും കേരള നോളജ് മിഷനും പ്രാധാന്യം നല്‍കി കാസര്‍കോട് ജില്ലാ പഞ്ചായത്ത് ശ്രീ നാരായണ ഓപ്പണ്‍ യൂണിവേഴ്‌സിറ്റിയുമായി കൈകോര്‍ക്കുന്നു.
ഈ പദ്ധതിയിലൂടെ ആദ്യ ഘട്ടത്തില്‍ അഞ്ഞൂറ് സ്ത്രീകളെ പ്രത്യേക ഫൗണ്ടേഷന്‍ കോഴ്‌സോടു കൂടിയുള്ള ബിരുദധാരികളും സ്വയം പര്യാപ്തരുമാക്കും.
ഇതിനായി ജില്ലയിലെ തദ്ദേശ സ്ഥാപനങ്ങളുടെ സഹകരണത്തോടെ യൂണിവേഴ്‌സിറ്റിയുമായും കിലയുമായും ചേര്‍ന്ന് ജില്ലയുടെ സമഗ്രമായ തൊഴില്‍ സംബന്ധമായ ഡിമാന്റ് മാപ്പിങ്ങ് നടത്താനും ധാരണയായി. ജില്ലാ കുടുംബശ്രീ-സാക്ഷരത മിഷനുകളുടെ നേതൃത്വത്തില്‍ ബിരുദ കോഴ്‌സുകളിലേക്ക് അപേക്ഷകള്‍ ക്ഷണിക്കാനാണ് ജില്ലാ പഞ്ചായത്ത് ലക്ഷ്യം വയ്ക്കുന്നത്.
കണ്ണൂര്‍ ഗസ്റ്റ് ഹൗസില്‍ നടന്ന യോഗത്തില്‍ ശ്രീ നാരായണ ഓപ്പണ്‍ യൂണിവേഴ്‌സിറ്റി വൈസ് ചാന്‍സിലര്‍ ഡോ: മുബാറക് പാഷ, ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണന്‍, വൈസ് പ്രസിഡന്റ് ഷാനവാസ് പാദൂര്‍, സ്റ്റാന്‍ഡിങ്ങ് കമ്മിറ്റി ചെയര്‍പേഴ്‌സണ്‍മാരായ കെ ശകുന്തള, ഗീതാകൃഷ്ണന്‍, അഡ്വ: സരിത എസ് എന്‍, ഷിനോജ് ചാക്കോ, ജാസ്മിന്‍ കബീര്‍, ആസൂത്രണ സമിതി വൈസ് ചെയര്‍മാന്‍ ഡോ: സി.തമ്പാന്‍, കുടുംബശ്രീ ഡി എം സി ടി ടി സുരേന്ദ്രന്‍, സാക്ഷരതാ മിഷന്‍ കോര്‍ഡിനേറ്റര്‍ ശ്രീജന്‍ പുന്നാട്, ആസൂത്രണ സമിതി അംഗം വിദ്യാധരന്‍ കെ ജി എന്നിവര്‍ സംബന്ധിച്ചു. ജില്ലാ പഞ്ചായത്ത് സെക്രട്ടറി പി നന്ദകുമാര്‍ നന്ദി പറഞ്ഞു.
No comments