വീട്ടിൽ നിന്നു ഏഴു പവൻ സ്വർണ്ണവും ലക്ഷം രൂപയുമായി ജോലിക്കാരൻ മുങ്ങി

കാസർകോട്: കർഷകൻ തനിച്ചു താമസിക്കുന്ന വീട്ടിൽ നിന്നു ഏഴു പവൻ സ്വർണ്ണവും ലക്ഷം രൂപയുമായി ജോലിക്കാരൻ മുങ്ങി. പൈവളിഗെ, കളായിയിലെ സഞ്ജീവഷെട്ടിയുടെ വീട്ടിലാണ് സംഭവം. ഇയാളുടെ മകൻ അശോക് കുമാറിന്റെ പരാതിയിന്മേൽ മഞ്ചേശ്വരം പൊലീസ് കേസെടുത്ത് അന്വേഷണം ആരംഭിച്ചു.

അശോക് കുമാർ ബംഗ്ളൂരുവിലാണ്. പ്രായമായ പിതാവിനെ ശുശ്രൂഷിക്കാൻ മറ്റാരും ഇല്ല. അതിനാൽ കർണ്ണാടക സ്വദേശിയായ ഒരു യുവാവിനെ വിട്ടു ജോലിക്കും മറ്റുമായി ഏർപ്പാടാക്കിയിരുന്നു. മാസങ്ങളായി പ്രസ്തുത യുവാവ് വീട്ടിൽ താമസിച്ചു ജോലി ചെയ്തു വരികയായിരുന്നു. എല്ലാ മാസവും ആദ്യത്തെ ആഴ്ചയാണ് ഇയാൾ സ്വദേശത്തേക്ക് പോയിരുന്നത്. എന്നാൽ ഇത്തവണ മാസാവസാനം തന്നെ നാട്ടിലേക്ക് പോയി. ഈ വിവരമറിഞ്ഞ് അശോക് കുമാർ വീട്ടിലെത്തി അലമാരയ്ക്കകത്ത് പരിശോധിച്ചപ്പോഴാണ് ഒരു ലക്ഷം രൂപ കാണാതായ കാര്യം അറിഞ്ഞത്. എന്നാൽ ഏഴു പവൻ തൂക്കമുള്ള നാലു വളകൾ അലമാരയിൽ തന്നെയുണ്ടായിരുന്നു. സ്വർണത്തിന്റെ നിറത്തിൽ സംശയം തോന്നി വിശദമായി പരിശോധിച്ചപ്പോഴാണ് വളകൾ മുക്കു പണ്ടമാണെന്നു വ്യക്തമായത്.