കാഞ്ഞങ്ങാട് - കുണ്ടംകുഴി- ബന്തടുക്ക - സുള്ള്യ കെ.എസ്.ആർ.ടി.സി ബസ് ആരംഭിക്കുന്നു

കാഞ്ഞങ്ങാട് : മലയോര ജനതയ്ക്ക് കര്‍ണ്ണാടകയിലെ സുള്ള്യയുമായി എളുപ്പത്തില്‍ ബന്ധപ്പെടുന്നതിന്  സഹായകരമാകുന്ന വിധത്തില്‍ കെ.എസ്‍.ആര്‍.ടി.സി. കാഞ്ഞങ്ങാട് ഡിപ്പോയില്‍ നിന്നും പെരിയ മൂന്നാംകടവ് കുണ്ടംകുഴി ബന്തടുക്ക കണ്ണാടിത്തോട് വഴി സുള്ള്യയിലേക്ക്  ബസ് സർവ്വീസ് ആരംഭിക്കുന്നതിന് ഉത്തരവായി. ഈ മേഖലയിലെ യാത്രാദുരിതം പരിഹരിക്കുന്നതിന് ബസ് സര്‍വ്വീസ് ആരംഭിക്കണമെന്ന് ഉദുമ എം.എൽ.എ സി. എച്ച് കുഞ്ഞമ്പു ഗതാഗത വകുപ്പ് മന്ത്രിയെ നേരിൽ കണ്ട് അഭ്യര്‍ത്ഥിച്ചിരുന്നു.

കാഞ്ഞങ്ങാട് നിന്നും രാവിലെ 6.40 ന് ആരംഭിച്ച് 9.20 ന് സുള്ള്യയിലേക്കും, തിരിച്ച് 09.30-11.45 സുള്ള്യ-കാഞ്ഞങ്ങാട്, ഉച്ചയ്ക്ക് 12.10–2.25 കാഞ്ഞങ്ങാട്-സുള്ള്യ, 02.35 – 04.50 സുള്ള്യ – കാഞ്ഞങ്ങാട് എന്ന ക്രമത്തില്‍ കാഞ്ഞങ്ങാട് നിന്നും സുള്ള്യയിലേക്ക് ബസ് സര്‍വ്വീസ് ആരംഭിക്കും. വൈകുന്നേരം 5 മണിക്ക് ദേശീയപാത വഴി കാസറഗോഡ് എത്തി 6.40 തിരിച്ച് രാത്രി 8 മണിക്ക് കാഞ്ഞങ്ങാട് ഡിപ്പോയില്‍ യാത്ര അവസാനിക്കുന്ന തരത്തിലുള്ള സമയക്രമമാണ് നിലവില്‍ അനുവദിച്ചിട്ടുള്ളത്. പെരിയ, മൂന്നാംകടവ്, കുണ്ടംകുഴി, കുറ്റിക്കോല്‍, ബന്തടുക്ക തുടങ്ങിയ പ്രദേശങ്ങളിലെ ജനങ്ങള്‍ക്ക് ഏറെ ഉപകാരപ്രദമാകുന്ന സര്‍വ്വീസ് എത്രയും പെട്ടെന്ന് ആരംഭിക്കുന്നതിനുള്ള നടപടികള്‍ സ്വീകരിക്കുന്നതിന് ബന്ധപ്പെട്ടവര്‍ക്ക് നിര്‍ദ്ദേശം നല്‍കിയതായും എം.എൽ.എ പറഞ്ഞു