സീതാംഗോളി ടൗണിൽ യുവാവിനെ കുത്തിക്കൊല്ലാൻ ശ്രമിച്ച കേസിൽ മുഖ്യപ്രതികളിൽ ഒരാൾ അറസ്റ്റിൽ.

കാസർകോട്: സീതാംഗോളി ടൗണിൽ യുവാവിനെ കുത്തിക്കൊല്ലാൻ ശ്രമിച്ച കേസിൽ  മുഖ്യപ്രതികളിൽ ഒരാൾ അറസ്റ്റിൽ. നീർച്ചാൽ, ബേളയിലെ ചൗക്കാർ ഹൗസിൽ അക്ഷയി (34)നെയാണ് കുമ്പള പൊലീസ് ഇൻസ്പെക്ടർ പി കെ ജിജീഷ്, എസ് ഐ കെ ശ്രീജേഷ് എന്നിവർ അറസ്റ്റു ചെയ്തത്. മറ്റു 12 പ്രതികൾക്കായി പൊലീസ് അന്വേഷണം ഊർജ്ജിതമാക്കി. ഞായറാഴ്ച രാത്രി 11.30മണിയോടെയാണ് കേസിനാസ്പദമായ സംഭവം. ബദിയഡുക്കയിലെ മത്സ്യ വിൽപ്പനക്കാരനായ അനിൽകുമാർ ആണ് വധശ്രമത്തിനു ഇരയായത്. സാമ്പത്തിക പ്രശ്നവുമായി ബന്ധപ്പെട്ട ചർച്ചയ്ക്കാണ് അനിൽ കുമാർ സീതാംഗോളിയിൽ എത്തിയത്. ഈ സമയത്ത് അക്ഷയിയുടെ നേതൃത്വത്തിൽ ഒരു സംഘം ആൾക്കാർ അനിൽകുമാറിനെ ആക്രമിച്ചുവെന്നാണ് കുമ്പള പൊലീസ് രജിസ്റ്റർ ചെയ്ത കേസ്.

സംഘർഷത്തിനു ഇടയിൽ കത്തി കഴുത്തിന്റെ പിൻഭാഗത്തു തറച്ച നിലയിലാണ് അനിൽകുമാറിനെ മംഗ്ളൂരുവിലെ ആശുപത്രിയിൽ എത്തിച്ചത്. സങ്കീർണ്ണമായ ശസ്ത്രക്രിയയിലൂടെയാണ് കത്തി നീക്കം ചെയ്തത്. സംഘർഷവുമായി ബന്ധപ്പെട്ട് രണ്ടു വാഹനങ്ങൾ പൊലീസ് കസ്റ്റഡിയിലെടുത്തിട്ടുണ്ട്.