ഓട്ടോയിൽ കടത്തുകയായിരുന്ന 28.32ഗ്രാം എം ഡി എം എ യുമായി രണ്ടു പേർ കാസർഗോഡ് വെച്ചു അറസ്റ്റിൽ
കാസർകോട്: ഓട്ടോയിൽ കടത്തുകയായിരുന്ന 28.32ഗ്രാം എം ഡി എം എ യുമായി രണ്ടു പേർ അറസ്റ്റിൽ. മുളിയാർ, മാസ്തിക്കുണ്ടിൽ ക്വാർട്ടേഴ്സിൽ താമസക്കാരനായ കെ ഉസ്മാൻ എന്ന ചാർളി ഉസ്മാൻ (43), മധൂർ, ഷിറിബാഗിലു, ബദർ ജുമാമസ്ജിദിനു സമീപത്തെ കുളത്തിങ്കര ഹൗസിലെ എം അബ്ദുൽ റഹ്മാൻ (55) എന്നിവരെയാണ് കാസർകോട് ടൗൺ എസ് ഐ കെ രാജീവനും സംഘവും അറസ്റ്റു ചെയ്തത്.
ബുധനാഴ്ച വൈകുന്നേരം അഞ്ചരമണിയോടെ ഷിരിബാഗിലുവിൽ വാഹന പരിശോധന നടത്തുകയായിരുന്നു എസ് ഐയും സംഘവും. ഇതിനിടയിൽ പെരിയടുക്ക ഭാഗത്തു നിന്നും എത്തിയ ഓട്ടോയ്ക്ക് കൈകാണിച്ചുവെങ്കിലും നിർത്താതെ പോയി. ഇതിൽ സംശയം തോന്നിയ പൊലീസ് ഓട്ടോയെ പിന്തുടർന്ന് പൊലീസ് വാഹനം റോഡിനു കുറുകെയിട്ട് തടഞ്ഞു. ഇതോടെ ഓട്ടോയിൽ ഉണ്ടായിരുന്നവർ ഇറങ്ങി ഓടാൻ ശ്രമിച്ചുവെങ്കിലും ബലം പ്രയോഗിച്ച് കീഴടക്കുകയായിരുന്നുവെന്നു പൊലീസ് പറഞ്ഞു.
തുടർന്ന് ഡ്രൈവർ സീറ്റിൻ്റെ അടിയിൽ പരിശോധിച്ചപ്പോഴാണ് മയക്കുമരുന്ന് കണ്ടെടുത്തതെന്നു പൊലീസ് പറഞ്ഞു. പൊലീസ് സംഘത്തിൽ ജൂനിയർ എസ് ഐ സി ആർ മൗഷമി, സി പി ഒ മാരായ ശ്യാം ചന്ദ്രൻ, രമേശ്, ഡ്രൈവർ ജിതീഷ് എന്നിവരും ഉണ്ടായിരുന്നു.
No comments