കാസർകോട് സബ് ജയിലിൽ പോക്സോ കേസിലെ റിമാന്റ് പ്രതി മരിച്ച സംഭവത്തിൽ ദേഹത്ത് പരിക്കുകളൊന്നും കണ്ടെത്താൻ കഴിഞ്ഞിട്ടില്ലെന്നും ഹൃദയാഘാതം ഉണ്ടായിട്ടില്ലെന്നുമാണ് പോസ്റ്റ് മോർട്ടത്തിന്റെ പ്രാഥമിക റിപ്പോർട്ട്

കാസർകോട്: കാസർകോട് സബ് ജയിലിൽ പോക്സോ കേസിലെ റിമാന്റ് പ്രതി മരിച്ച സംഭവത്തിലെ ദുരൂഹത നീങ്ങിയില്ല. മരണകാരണം കണ്ടെത്തുന്നതിനായി മൃതദേഹത്തിൽ നിന്നും എടുത്ത 'വിസിറ' രാസപരിശോധനയ്ക്ക് അയച്ചു. ഇതിനെ റിപ്പോർട്ട് കിട്ടിയാൽ മാത്രമേ മരണ കാരണം എന്താണെന്നു വ്യക്തമാവുകയുള്ളൂവെന്ന് പൊലീസ് വൃത്തങ്ങൾ പറഞ്ഞു. വിദ്യാനഗർ പൊലീസ് 2016ൽ രജിസ്റ്റർ ചെയ്ത പോകോസോ കേസിലെ പ്രതിയായ ദേളി, കുന്നുപാറയിലെ മുബഷീർ (29) ബുധനാഴ്ച പുലർച്ചെയാണ് മരിച്ചത്. ശാരീരിക അസ്വസ്ഥതകൾ പ്രകടിപ്പിച്ചതിനെ തുടർന്ന് ജനറൽ ആശുപ്രതിയിൽ എത്തിച്ചുവെങ്കിലും രക്ഷിക്കാനായില്ലെന്നാണ് ജയിൽ അധികൃതർ പറയുന്നത്. മരണത്തിൽ ബന്ധുക്കൾ സംശയം പ്രകടിപ്പിച്ചതിനാൽ പരിയാരം മെഡിക്കൽ കോളേജ് ആശുപത്രിയിലാണ് പോസ്റ്റുമോർട്ടം നടത്തിയത്. മരണകാരണം എന്താണെന്നു പോസ്റ്റുമോർട്ടത്തിൽ വ്യക്തമായിട്ടില്ല. ദേഹത്ത് പരിക്കുകളൊന്നും കണ്ടെത്താൻ കഴിഞ്ഞിട്ടില്ലെന്നും ഹൃദയാഘാതം ഉണ്ടായിട്ടില്ലെന്നുമാണ് പോസ്റ്റ് മോർട്ടത്തിന്റെ പ്രാഥമിക റിപ്പോർട്ട്. ഇതേ തുടർന്നാണ് വിശദമായ രാസപരിശോധനയ്ക്കായി 'വിസിറ' അയച്ചതെന്നു അധികൃതർ വ്യക്തമാക്കി.