ഉപ്പള, റെയിൽവെ ഗേറ്റിനു സമീപത്ത് യുവാവിനെ ദുരൂഹസാഹചര്യത്തിൽ മരിച്ച നിലയിൽ കണ്ടെത്തി

കാസർകോട്: മഞ്ചേശ്വരം പൊലീസ് സ്റ്റേഷൻ പരിധിയിലെ ഉപ്പള, റെയിൽവെ ഗേറ്റിനു സമീപത്ത് യുവാവിനെ ദുരൂഹസാഹചര്യത്തിൽ മരിച്ച നിലയിൽ കണ്ടെത്തി. റെയിൽവെ ട്രാക്കിനു സമീപത്താണ് ശനിയാഴ്ച രാവിലെ മൃതദേഹം കാണപ്പെട്ടത്. പാന്റ്സും ബനിയനുമാണ് വേഷം ധരിച്ചിരുന്നതെന്നു സംശയിക്കുന്ന ഷർട്ട് ഊരി വെച്ച നിലയിൽ കണ്ടെത്തി. താടിയുണ്ട്. 45 വയസു പ്രായം തോന്നിക്കുന്നു. പാന്റ്സിന്റെ പോക്കറ്റിൽ നിന്നും ഒരു താക്കോലും സിറിഞ്ചും കണ്ടെടുത്തതായി പൊലീസ് പറഞ്ഞു. യുവാവ് എത്തിയതെന്നു സംശയിക്കുന്ന വണ്ടി നിർത്തിയിട്ടുണ്ടോ എന്ന് അറിയാൻ സമീപ സ്ഥലങ്ങളിൽ പരിശോധന നടത്തിയെങ്കിലും കണ്ടെത്താൻ കഴിഞ്ഞില്ലെന്ന് കൂട്ടിച്ചേർത്തു. മഞ്ചേശ്വരം എസ്ഐ വൈഷ്ണവ്, ജൂനിയർ എഐ ശബരികൃഷ്ണൻ എന്നിവരുടെ നേതൃത്വത്തിൽ പൊലീസ് സ്ഥലത്തെത്തി അന്വേഷണം തുടങ്ങി.