ബി എൽ ഒയുടെ കോളറിൽ പിടിച്ച് അക്രമിക്കാൻ ശ്രമിച്ചതായി പരാതി. സംഭവത്തിൽ ജില്ലാ കളക്ടർക്ക് പരാതി നൽകി

കാസർകോട്: ബി എൽ ഒയുടെ കോളറിൽ പിടിച്ച് അക്രമിക്കാൻ ശ്രമിച്ചതായി പരാതി. സംഭവത്തിൽ ജില്ലാ കളക്ടർക്കു പരാതി നൽകി. ബന്തടുക്ക, ബിവറേജസ് ഷോപ്പിലെ ജീവനക്കാരനും ദേലംപാടി പഞ്ചായത്തിലെ പയറടുക്ക ബൂത്തിലെ ബി എൽ ഒയുമായ അജിത്താണ് പരാതിക്കാരൻ. വ്യാഴാഴ്‌ച രാവിലെ ബൂത്തിലെ ക്യാമ്പിലാണ് സംഭവം. ഈ ബൂത്തിൽ

പുഷ്പയെന്നു പേരുള്ള രണ്ടു വോട്ടർമാരുണ്ട്. ഇവരിൽ ഒരാളുടെ എസ് ഐ ആർ ഫോറം എൽപ്പിച്ചിരുന്നു. രണ്ടാമത്തെ ആളുടെ ഫോം മറ്റൊരാൾ വശമാണ് കൊടുത്തയച്ചിരുന്നത്. ഇതുമായി ബന്ധപ്പെട്ട് ദേലംപാടി പഞ്ചായത്ത് സ്റ്റാൻ്റിംഗ് കമ്മിറ്റി ചെയർമാൻ സുരേന്ദ്രനാണ് കയ്യേറ്റം ചെയ്യാൻ ശ്രമിച്ചതെന്നു അജിത്ത് നൽകിയ പരാതിയിൽ പറഞ്ഞു. ഫോം കൊടുത്തയച്ചിട്ടുണ്ടെന്നും കിട്ടിയില്ലെങ്കിൽ വീണ്ടും നൽകാമെന്നും മറുപടി പറഞ്ഞതായി പറയുന്നു.

ഇതോടെയാണ് പ്രകോപിതനായ സുരേന്ദ്രൻ കോളറിൽ പിടിച്ചു തള്ളിയിടാൻ ശ്രമിച്ചതെന്നു അജിത്ത് നൽകിയ പരാതിയിൽ പറയുന്നു. ജില്ലാ കളക്ടറുടെ നിർദ്ദേശപ്രകാരം നടപടികൾ സ്വീകരിക്കാനാണ് പൊലീസിൻ്റെ തീരുമാനം.