ഒരേ ദിവസം ജനിച്ച് ഒരേ ദിവസം ഒരേ വകുപ്പിൽ ഒരേ തസ്തികയിൽ ജോലി നേടി വെള്ളരിക്കുണ്ട് കൂരാംകുണ്ടിലെ ഇരട്ട സഹോദരിമാർ ശ്രദ്ധേയരായി

ഭീമനടി : ഒരേ ദിവസം ജനിച്ച് ഒരേ ദിവസം ഒരേ വകുപ്പിൽ ഒരേ തസ്തികയിൽ ജോലി നേടി ഇരട്ട സഹോദരിമാർ ശ്രദ്ധേയരായി. റിട്ട. കെഎസ്ഇബി സീനിയർ സൂപ്രണ്ട് കൂരാംകുണ്ടിലെ കളരിമുറിയിൽ ജോസഫിന്റെയും കല്ലഞ്ചിറ കെഐഎഎൽപി സ്കൂൾ പ്രധാനധ്യാപിക സുനീ ജോർജിന്റെയും ഇരട്ട കുട്ടികളായ സവിത ജോസഫ്, സംഗീത ജോസഫ് എന്നിവരാണ് അഭിമാനകരമായ നേട്ടം കൈവരിച്ചത്. രണ്ടുപേരും പരിമിതികളോട് പടപൊരുതി തന്നെയാണ് സർക്കാർ സർവീസിൽ കയറിയത്. ഭീമനടിയിലെ പി എസ് സി കോച്ചിങ് സെന്ററായ കാറ്റലിസ്റ്റിൽ പഠിച്ചാണ് 23 കാരികളായ ഇവർ രണ്ടുപേരും പി എസ് സി ലിസ്റ്റിൽ ഇടം നേടി നിയമന ഉത്തരവ് കരസ്ഥമാക്കിയത്. സവിത ഹൊസ്ദുർഗ് സബ് കോർട്ടിലും, സംഗീത ഹൊസ്ദുർഗ് മുൻസിഫ് കോർട്ടിലും ലാസ്റ്റ് ഗ്രേഡ് സെർവന്റായാണ് നിയമിതരായത്. കല്ലഞ്ചിറ എഎൽപി സ്കൂളിലും, പ്ലാച്ചിക്കര എയുപി സ്കൂളിലും, വരക്കാട് വള്ളിയോടൻ കേളുനായർ സ്മാരക ഹയർസെക്കൻഡറി സ്കൂളിലും ആയിരുന്നു വിദ്യാഭ്യാസം. പരീക്ഷകൾ എല്ലാം തന്നെ സഹായികളില്ലാതെ എഴുതിയാണ് ഈ മിടുക്കികൾ ഇതുവരെയും വിജയം നേടിയത്.