വനിതാ ബി എൽ ഒയെ വഴിയിൽ തടഞ്ഞു നിർത്തി എസ് ഐ ആർ വിവരങ്ങൾ ഫോണിലേയ്ക്ക് പകർത്തിയ ബി ജെ പി പ്രവർത്തകൻ അറസ്റ്റിൽ

കാസർകോട് : വനിതാ ബി എൽ ഒയെ വഴിയിൽ തടഞ്ഞു നിർത്തി എസ് ഐ ആർ വിവരങ്ങൾ ഫോണിലേയ്ക്ക് പകർത്തിയ ബി ജെ പി പ്രവർത്തകൻ അറസ്റ്റിൽ . ഉപ്പള, മണിമുണ്ടയിലെ ഇ എസ് അമിതി (34)നെയാണ് മഞ്ചേശ്വരം പൊലീസ് അറസ്റ്റു ചെയ്തത്. ഇന്നലെ ഉച്ചകഴിഞ്ഞ് 2.30 മണിയോടെ ഉപ്പള ബസ്സ്റ്റാന്റിനു സമീപത്താണ് കേസിനാസ്പദമായ സംഭവം. ബി എൽ ഒ ആയ ബേക്കൂർ, കണ്ണാടിപ്പാറ, മാതൃനിലയത്തിൽ എ സുഭാഷിണി (41)യാണ് പരാതിക്കാരി. എസ് ഐ ആർ ഡാറ്റ കലക്ഷൻ നടത്തി മടങ്ങുകയായിരുന്നു പരാതിക്കാരി. ഇതിനിടയിൽ അമിത് ബി എൽ ഒ ആയ സുഭാഷിണിയെ തടഞ്ഞു നിർത്തി ഭീഷണിപ്പെടുത്തുകയായിരുന്നുവെന്നു മഞ്ചേശ്വരം പൊലീസ് രജിസ്റ്റർ ചെയ്ത കേസിൽ പറയുന്നു. പരാതിക്കാരിയുടെ കൈവശം ഉണ്ടായിരുന്ന ഫോൺ എടുത്ത് എസ് ഐ ആർ ഡീറ്റേൽസിന്റെ ആപ്ലിക്കേഷൻ തുറന്നു കാണിക്കാൻ നിർബന്ധിക്കുകയും വിവരങ്ങൾ പ്രതിയുടെ ഫോണിലേയ്ക്ക് അയക്കുകയും അതുവഴി ഔദ്യോഗിക കൃത്യ നിർവഹണം തടസ്സപ്പെടുത്തുകയും ചെയ്തു എന്നാണ് പരാതി.ജില്ലാ കലക്ടറുടെയും ജില്ലാ പോലീസ് മേധാവിയുടെയും നിർദ്ദേശപ്രകാരമാണ് കേസെടുത്ത് അറസ്റ്റ് ചെയ്തത്