അനധികൃത മണൽ കടത്ത് നീലേശ്വരത്ത് പോലീസ് നടപടി കടുപ്പിച്ചു ; ടിപ്പർ ലോറി കസ്റ്റഡിയിൽ

നീലേശ്വരം :അനധികൃത മണൽ കടത്തിനെതിരെ നീലേശ്വരം പോലീസ് നടപടി കടുപ്പിച്ചു.അതിൻ്റെ ഭാഗമായി അനധികൃതമായി കരമണൽ കടത്തുകയായിരുന്ന ടിപ്പർ ലോറി നീലേശ്വരം പോലീസ് കസ്റ്റഡിയിലെടുത്തു.ഇന്ന് രാവിലെ 5 മണിയോടെ പെട്രോളിങ് നടത്തുകയായിരുന്ന നീലേശ്വരം എസ് ഐ കെ സുഭാഷിന്റെ നേതൃത്വത്തിലുള്ള പോലീസ് സംഘമണ് ദേശീയപാതയിൽ നീലേശ്വരം മാർക്കറ്റിൽ നളന്ദ റിസോർട്ടിന് മുൻവശം വെച്ച് കാഞ്ഞങ്ങാട് ഭാഗത്തുനിന്നും കര മണലുമായി വരികയായിരുന്ന   കെ എൽ 59 ബി 3142 നമ്പർ ടിപ്പർ ലോറി  കസ്റ്റഡിയിലെടുത്തത്.ലോറി സ്റ്റേഷൻ കോമ്പൗണ്ടിലേക്ക് മാറ്റി.പോലീസ് സംഘത്തിൽ എസ് ഐക്ക് പുറമേ സി പി ഒ മാരായ ബാബു, അജിത്ത് എന്നിവരുമുണ്ടായിരുന്നു. സംഭവത്തിൽ വാഹനം ഓടിച്ചിരുന്ന ഉപ്പിലിക്കൈ വാഴുന്നോറടി ചാളക്കുഴി ദാമോദരന്റെ മകൻ എം സുധീഷ്  (32) നെ അറസ്റ്റ് ചെയ്ത് ജിയോളജി വകുപ്പിന് കൈമാറി.വരും ദിവസങ്ങളിലും അനധികൃത മണൽ കടത്തിനെതിരെ ശക്തമായ നടപടികൾ സ്വീകരിക്കുമെന്ന് നീലേശ്വരം പോലീസ് അറിയിച്ചു.