നിതിന്റെ മരണം: 'ഇന്സ്റ്റാ പേ' ലോണ് ആപ്പിനെതിരെ കേസെടുത്ത് പൊലീസ്
കണ്ണൂര്: അഞ്ചരക്കണ്ടി ഡെന്റല് കോളേജ് വിദ്യാര്ത്ഥി നിതിന് രാജിന്റെ മരണത്തില് ലോണ് ആപ്പിനെതിരെ കേസെടുത്ത് പൊലീസ്. ഇന്സ്റ്റാ പേ എന്ന ആപ്പിനെതിരെയാണ് കേസെടുത്തത്. നിതിന് രാജിനെ ഭയപ്പെടുത്തി പണം തിരിച്ചടക്കാന് പ്രേരിപ്പിച്ചുവെന്നാണ് എഫ്ഐആര്. മാനസികമായി പീഡിപ്പിച്ചു എന്നും എഫ്ഐആറിലുണ്ട്. ചക്കരക്കല് പൊലീസ് സ്വമേധയാ കേസെടുക്കുകയായിരുന്നു.
ലോണ് ആപ്പില് നിന്ന് അധ്യാപികയായ ലതയ്ക്ക് ഫോണ് കോളുകള് വന്നിരുന്നു. തുടര്ന്ന് നിതിന് രാജിനെ പ്രിന്സിപ്പല് ചേംബറില് വിളിച്ച് വരുത്തി ചോദ്യം ചെയ്തിരുന്നു.തൊട്ടുപിന്നാലെയായിരുന്നു നിതിന് ആത്മഹത്യ ചെയ്തത്. ആത്മഹത്യയില് ലോണ് ആപ്പിന് പങ്കുണ്ടെന്ന് നേരത്തെ പൊലീസ് കണ്ടെത്തിയിരുന്നു. നിതിന്റെ ആത്മഹത്യയ്ക്ക് ശേഷം ലത സൈബര് സെല്ലിന് പരാതി നല്കിയിരുന്നു. ഈ പരാതി സൈബര് സെല്ല് ചക്കരക്കല്ല് പൊലീസിന് കൈമാറുകയും സ്വമേധയാ കേസെടുക്കുകയുമായിരുന്നു.
No comments