പാണത്തൂർ പോലീസ് ഔട്ട്‌പോസ്റ്റ് പോലീസ് സ്‌റ്റേഷനായി ഉയർത്തണമെന്ന ആവശ്യം ശക്തമാകുന്നു...

പാണത്തൂർ: പാണത്തൂരിലെ നിലവിലെ പോലീസ് ഔട്ട്‌പോസ്റ്റ് പൂർണ്ണരൂപത്തിലുള്ള പോലീസ് സ്‌റ്റേഷനായി ഉയർത്തണമെന്ന ആവശ്യം പ്രദേശവാസികൾക്കിടയിൽ വീണ്ടും ശക്തമാകുന്നു. പത്ത് വർഷങ്ങൾക്ക് മുൻപ് അന്നത്തെ ആഭ്യന്തര മന്ത്രിയായിരുന്ന രമേശ് ചെന്നിത്തലയാണ് ഈ ഔട്ട്‌പോസ്റ്റ് പോലീസ് സ്റ്റേഷൻ ആക്കി മാറ്റാമെന്ന് പ്രഖ്യാപിച്ചത്. കുണ്ടുപ്പള്ളിയിൽ വെച്ച് നടന്ന കമ്മ്യൂണിറ്റി ഹാൾ ഉദ്ഘാടന വേളയിൽ ഭാവിയിൽ ഇതൊരു പോലീസ് സ്‌റ്റേഷനായി ഉയർത്തുമെന്ന് അദ്ദേഹം ഉറപ്പ് നൽകിയിരുന്നു.

അന്ന് ആഭ്യന്തര മന്ത്രിയുടെ ശ്രദ്ധയിൽ ഈ വിഷയം ഔദ്യോഗികമായി അവതരിപ്പിക്കുകയും നിവേദനം നൽകുകയും ചെയ്തത് അന്നത്തെ പനത്തടി പഞ്ചായത്ത് വൈസ് പ്രസിഡന്റും നിലവിലെ സ്റ്റാൻഡിങ് കമ്മിറ്റി ചെയർമാനുമായ കെ.ജെ ജെയിംസിന്റെ നേതൃത്വത്തിലായിരുന്നു. എന്നാൽ പിന്നീട് പഞ്ചായത്തിലും സംസ്ഥാനത്തും ഉണ്ടായ ഭരണമാറ്റങ്ങൾ ഈ പദ്ധതിയുടെ ഫോളോ-അപ്പ് നടപടികളെ ബാധിച്ചുവെന്ന് അദ്ദേഹം പറഞ്ഞു. 

അതിർത്തി പ്രദേശങ്ങളുമായി പങ്കിടുന്ന മേഖലയായതിനാൽ ക്രമസമാധാന പാലനത്തിനും ജനങ്ങളുടെ സുരക്ഷയ്ക്കും പാണത്തൂരിൽ ഒരു പോലീസ് സ്‌റ്റേഷൻ അത്യന്താപേക്ഷിതമാണ്.  ഈ സാഹചര്യത്തിൽ, പോലീസ് സ്‌റ്റേഷൻ യാഥാർത്ഥ്യമാക്കുന്നതിന് ആവശ്യമായ തുടർ പരിശ്രമങ്ങളും ഫോളോ-അപ്പ് നടപടികളും വീണ്ടും ഊർജ്ജിതമാക്കുമെന്ന് കെ.ജെ ജെയിംസ് അറിയിച്ചു. 

ഇതുമായി ബന്ധപ്പെട്ട വാർത്തകൾ പുറത്തുവരുന്നത് വഴി സർക്കാരിന്റെയും ബന്ധപ്പെട്ട വകുപ്പുകളുടെയും ശ്രദ്ധ ഈ വിഷയത്തിലേക്ക് വീണ്ടും എത്തിക്കാൻ കഴിയുമെന്ന പ്രതീക്ഷയിലാണ് പ്രദേശവാസികൾ.