ദുരന്തഭീഷണിയിൽ വെള്ളരിക്കുണ്ട് പന്നിത്തടം കയറ്റം; റോഡിലേക്ക് പതിക്കാൻ തയ്യാറായി മൺത്തിട്ടയും മരങ്ങളും

വെള്ളരിക്കുണ്ട്: വെള്ളരിക്കുണ്ട്–കാരാട്ട് റോഡിലെ പന്നിത്തടം കയറ്റത്തിൽ ഏത് നിമിഷവും മണ്ണിടിഞ്ഞ് റോഡിലേക്ക് പതിക്കാവുന്ന നിലയിൽ മൺത്തിട്ടയും കൂറ്റൻ മരങ്ങളും അപകടഭീഷണി ഉയർത്തുന്നു. ദിവസേന നിരവധി വാഹനങ്ങളും കാൽനട യാത്രക്കാരും സ്കൂൾ വിദ്യാർത്ഥികളും സഞ്ചരിക്കുന്ന റോഡായതിനാൽ പ്രദേശവാസികൾ കടുത്ത ആശങ്കയിലാണ്.

റോഡിന്റെ ഇരുവശങ്ങളിലും ഉയർന്ന മൺത്തിട്ടകളുള്ള ഈ ഭാഗത്ത് മഴ ശക്തമായതോടെ മണ്ണിടിച്ചിലിന് സാധ്യത വർധിച്ചിരിക്കുകയാണ്. ചില മരങ്ങൾ മണ്ണ് ഇളകി റോഡിലേക്ക് ചാഞ്ഞുനിൽക്കുന്നതായും നാട്ടുകാർ ചൂണ്ടിക്കാട്ടുന്നു. ഇവ ഏത് സമയത്തും റോഡിലേക്ക് വീഴാൻ സാധ്യതയുള്ളതിനാൽ വലിയ അപകടം സംഭവിക്കുമെന്ന ആശങ്ക നിലനിൽക്കുന്നു.

ഇതിനൊപ്പം, ഈ ഭാഗത്തെ ടാറിംഗ് വ്യാപകമായി തകർന്നതോടെ റോഡ് ഗതാഗതയോഗ്യമല്ലാത്ത അവസ്ഥയിലുമാണ്. മഴക്കാലത്ത് കുഴികളും തകർന്ന റോഡും യാത്രക്കാരെ കൂടുതൽ ദുരിതത്തിലാക്കുകയാണ്.

വലിയ ദുരന്തമുണ്ടാകുന്നതിന് മുമ്പ് അപകടഭീഷണി ഉയർത്തുന്ന മൺത്തിട്ടകളും മരങ്ങളും സുരക്ഷിതമാക്കുകയും റോഡ് അടിയന്തരമായി അറ്റകുറ്റപ്പണികൾ നടത്തി ഗതാഗതയോഗ്യമാക്കുകയും ചെയ്യണമെന്ന് പ്രദേശവാസികൾ ബന്ധപ്പെട്ട അധികൃതരോട് ആവശ്യപ്പെട്ടു.