സ്വപ്നം കണ്ടു, പരിശ്രമിച്ചു നേടി, എം ബി ബി എസ് ഡോക്ടറായി കാലിച്ചാമരത്തെ ആര്യ എസ് രാജ്

കരിന്തളം: മലയോര മേഖലയിലെ ഒരു സാധാരണ കുടുംബത്തിൽ നിന്ന് ഉയർന്നു വന്ന് എംബിബിഎസ് ബിരുദം നേടി ഡോക്ടറായിരിക്കുകയാണ് കാലിച്ചാമരത്തെ ആര്യ എസ് രാജ്. കഠിനാധ്വാനവും നിരന്തര പരിശ്രമവും കൊണ്ട് സ്വപ്നസാക്ഷാത്കാരം നേടിയ ആര്യയുടെ നേട്ടം കുടുംബത്തിനും നാടിനും ഒരുപോലെ അഭിമാന നിമിഷമായി മാറിയിരിക്കുകയാണ്.

കാലിച്ചാമരത്തെ പി. എം. രാജൻ–കെ. പി. ശ്രീജ ദമ്പതികളുടെ മകളായ ആര്യ എസ് രാജ് കോഴിക്കോട് മുക്കത്തെ കെ.എം.സി.ടി മെഡിക്കൽ കോളേജിൽ നിന്നാണ് എംബിബിഎസ് പഠനം വിജയകരമായി പൂർത്തിയാക്കിയത്. പഠനം പൂർത്തിയാക്കിയ ആര്യ അതേ മെഡിക്കൽ കോളേജിൽ തന്നെ ഹൗസ് സർജൻസി വിഭാഗത്തിൽ സേവനമാരംഭിക്കാനൊരുങ്ങുകയാണ്.

ഗ്രാമീണ പശ്ചാത്തലത്തിൽ വളർന്ന ആര്യയുടെ വിദ്യാഭ്യാസ യാത്ര പൊതുവിദ്യാലയങ്ങളിലൂടെയായിരുന്നു. കമ്പല്ലൂർ ബെഡൂർ സ്കൂളിലും കടുമേനി എസ്.എൻ.ഡി.പി സ്കൂളിലുമായിരുന്നു പ്രാഥമിക വിദ്യാഭ്യാസം. തുടർന്ന് നീലേശ്വരം ചിൻമയ വിദ്യാലയത്തിൽ ഹൈസ്കൂൾ പഠനവും ചായ്യോത്ത് ഗവൺമെന്റ് ഹയർസെക്കൻഡറി സ്കൂളിൽ പ്ലസ് ടു പഠനവും പൂർത്തിയാക്കി. വിദ്യാർത്ഥി ജീവിതം മുഴുവൻ പഠനത്തിൽ മികച്ച പ്രകടനം കാഴ്ചവെച്ച ആര്യ അധ്യാപകരുടെയും സഹപാഠികളുടെയും പ്രിയങ്കരിയായിരുന്നു.

പഠനരംഗത്തെ മികവിനൊപ്പം കലാരംഗത്തും ആര്യ ശ്രദ്ധേയയായിരുന്നു. നൃത്തത്തിലും ചിത്രരചനയിലും പ്രത്യേക താൽപര്യം പുലർത്തിയിരുന്ന അവർ വിവിധ കലാപരിപാടികളിലും മത്സരങ്ങളിലും സജീവ സാന്നിധ്യമായിരുന്നു. അക്കാദമിക രംഗത്തും പാഠ്യേതര പ്രവർത്തനങ്ങളിലുമുള്ള മികവ് തന്നെയാണ് ആര്യയെ സഹപാഠികൾക്കിടയിൽ വേറിട്ട വ്യക്തിത്വമാക്കിയത്.

സാമ്പത്തികമായും സാമൂഹികമായും വലിയ ആഡംബരങ്ങളില്ലാത്ത കുടുംബത്തിൽ നിന്നാണ് ആര്യയുടെ ഈ നേട്ടം. അച്ഛൻ പി. എം. രാജൻ കഴിഞ്ഞ വർഷം ക്ഷീരോൽപാദക സംഘം സെക്രട്ടറിയായി വിരമിച്ച ശേഷം നിലവിൽ കാലിച്ചാമരത്ത് മിൽമ പാർലർ നടത്തിവരികയാണ്. അമ്മ കെ. പി. ശ്രീജയുടെ പിന്തുണയും കുടുംബത്തിന്റെ പ്രോത്സാഹനവും ആര്യയുടെ വിജയയാത്രയിൽ നിർണായക പങ്കുവഹിച്ചു. സഹോദരൻ കിരൺ എസ് രാജ് ഡിഗ്രി വിദ്യാർഥിയാണ്.

മലയോര മേഖലയിലെ വിദ്യാർഥികൾക്ക് പ്രചോദനമാകുന്ന നേട്ടമാണ് ആര്യ എസ് രാജ് സ്വന്തമാക്കിയിരിക്കുന്നതെന്ന് നാട്ടുകാർ അഭിപ്രായപ്പെടുന്നു. പൊതുവിദ്യാലയങ്ങളിൽ പഠിച്ച് ആത്മവിശ്വാസവും കഠിനാധ്വാനവും കൈമുതലാക്കി ഡോക്ടറായ ആര്യയുടെ വിജയം യുവതലമുറയ്ക്ക് പുതിയ പ്രതീക്ഷയും പ്രചോദനവുമാണ് നൽകുന്നത്. നാട്ടുകാരും അധ്യാപകരും സഹപാഠികളും ബന്ധുക്കളുമടക്കം നിരവധി പേർ ആര്യയെ അഭിനന്ദിച്ച് രംഗത്തെത്തിയിട്ടുണ്ട്.