പ്രതിസന്ധികളെ അതിജീവിച്ച ശ്രീധന്യ സുരേഷ് ഇനി കാസര്‍കോട് കളക്ടര്‍
വയനാട്ടിലെ ഒരു സാധാരണ ആദിവാസി കുടുംബത്തില്‍നിന്ന് രാജ്യത്തെ ഏറ്റവും അഭിമാനകരമായ സിവില്‍ സര്‍വീസ് പരീക്ഷ വിജയിച്ച് ഐ.എ.എസ് നേടിയ ശ്രീധന്യ സുരേഷ് ഇനി കാസര്‍ഗോഡ് ജില്ലാ കളക്ടര്‍. കേരളത്തിലെ പട്ടികവര്‍ഗ വിഭാഗത്തില്‍നിന്നുള്ള ആദ്യ വനിതാ ഐഎഎസ് ഉദ്യോഗസ്ഥയായ ശ്രീധന്യയുടെ പുതിയ നിയമനം ചരിത്രപ്രാധാന്യമുള്ള നേട്ടമായാണ് വിലയിരുത്തപ്പെടുന്നത്.
വയനാട്ടിലെ പൊഴുതന പഞ്ചായത്തിലെ ആദിവാസി കോളനിയിലായിരുന്നു ശ്രീധന്യയുടെ ബാല്യം. കൂലിപ്പണിയെ ആശ്രയിച്ചായിരുന്നു കുടുംബത്തിന്റെ ജീവിതം. പിതാവ് സുരേഷ് ദിവസക്കൂലിക്കാരനും മാതാവ് കമല തൊഴിലുറപ്പ് പദ്ധതിയില്‍ ജോലി ചെയ്തുമായിരുന്നു കുടുംബം പുലര്‍ത്തിയത്. പരിമിതമായ സാമ്പത്തിക സാഹചര്യങ്ങള്‍ക്കിടയിലും മാതാപിതാക്കള്‍ മകളുടെ വിദ്യാഭ്യാസത്തിന് വലിയ പ്രാധാന്യം നല്‍കി. കുടുംബത്തിന് ലഭിച്ച വരുമാനത്തിന്റെ വലിയൊരു ഭാഗം വിദ്യാഭ്യാസത്തിനായി മാറ്റിവെച്ചിരുന്നുവെന്ന് ശ്രീധന്യ തന്നെ പിന്നീട് പറഞ്ഞിട്ടുണ്ട്.
അഞ്ചാം വയസ്സുമുതല്‍ ഏകദേശം നാല് കിലോമീറ്റര്‍ നടന്ന് സ്‌കൂളിലെത്തിയിരുന്ന ശ്രീധന്യ പഠനത്തിലും മികവ് പുലര്‍ത്തി. പത്താം ക്ലാസില്‍ 85 ശതമാനം മാര്‍ക്ക് നേടിയ ശേഷം കോഴിക്കോട് ദേവഗിരി കോളജില്‍ സുവോളജി പഠിച്ചു. തുടര്‍ന്ന് കാലിക്കറ്റ് സര്‍വകലാശാലയില്‍ നിന്ന് സുവോളജിയില്‍ ബിരുദാനന്തര ബിരുദം നേടി.
വയനാട്ടിലെ വൈത്തിരി ട്രൈബല്‍ ടൂറിസം ഡെവലപ്‌മെന്റ് ഓഫീസില്‍ ജോലി ചെയ്തിരുന്ന കാലത്താണ് സിവില്‍ സര്‍വീസിനെക്കുറിച്ചുള്ള ആഗ്രഹം ശക്തമായത്. അന്നത്തെ മാനന്തവാടി സബ് കളക്ടര്‍ ശ്രീറാം സാംബശിവ റാവുവിനെ ഒരു പൊതുപരിപാടിയില്‍ കണ്ട അനുഭവം തന്റെ ജീവിതത്തിലെ വഴിത്തിരിവായിരുന്നുവെന്ന് ശ്രീധന്യ വ്യക്തമാക്കിയിട്ടുണ്ട്.
2018ലെ യു.പി.എസ്.സി സിവില്‍ സര്‍വീസ് പരീക്ഷയില്‍ 410-ാം റാങ്ക് നേടിയ ശ്രീധന്യ 2019 ബാച്ച് ഐ.എ.എസ് ഉദ്യോഗസ്ഥയായി. കോഴിക്കോട് അസിസ്റ്റന്റ് കളക്ടര്‍, പെരിന്തല്‍മണ്ണ സബ് കളക്ടര്‍ തുടങ്ങി വിവിധ ചുമതലകള്‍ വഹിച്ച അവര്‍ പിന്നീട് ഭക്ഷ്യസുരക്ഷാ കമ്മീഷണറായും പ്രവര്‍ത്തിച്ചു.
2026 സെപ്റ്റംബര്‍ 11ന് കേരള സര്‍ക്കാര്‍ നടത്തിയ ഐ.എ.എസ് ഉദ്യോഗസ്ഥരുടെ പുനര്‍നിയമനത്തിന്റെ ഭാഗമായാണ് ശ്രീധന്യയെ കാസര്‍ഗോഡ് ജില്ലാ കളക്ടറായി നിയമിച്ചത്. നിലവിലെ കളക്ടര്‍ അര്‍ജുന്‍ പാണ്ഡ്യനെ കൃഷി വികസന-കര്‍ഷക ക്ഷേമ വകുപ്പ് ഡയറക്ടറായി മാറ്റിയിട്ടുണ്ട്.
പ്രതിസന്ധികള്‍ക്ക് മുന്നില്‍ തളരാതെ വിദ്യാഭ്യാസത്തെ ആയുധമാക്കി മുന്നേറിയ ശ്രീധന്യ സുരേഷിന്റെ ജീവിതം, പിന്നാക്ക സാഹചര്യങ്ങളില്‍നിന്ന് ഉയരാന്‍ ആഗ്രഹിക്കുന്ന ആയിരക്കണക്കിന് യുവതീയുവാക്കള്‍ക്ക് പ്രചോദനമാണ്. കാസര്‍ഗോഡിന്റെ ഭരണചുമതല ഏറ്റെടുക്കുന്നതോടെ ആ പ്രചോദനകഥയ്ക്ക് പുതിയൊരു അധ്യായം കൂടി എഴുതപ്പെടുകയാണ്.
No comments