ബൂത്തിൽ പാർട്ടി മാസ്ക് ധരിച്ച് പ്രിസൈഡിങ് ഓഫീസർ; പ്രതിഷേധത്തിനൊടുവിൽ ചുമതലയിൽ നിന്ന് നീക്കി കളക്ടർ
കൊല്ലം: പോളിങ് ബൂത്തില് പാര്ട്ടി ചിഹ്നം പതിച്ച മാസ്ക് ധരിച്ചെത്തിയ വനിതാ പ്രിസൈഡിങ് ഓഫീസറെ ജില്ലാ കളക്ടര് ഇടപെട്ട് ചുമതലയില് നിന്നും നീക്കി. പകരം ഉദ്യോഗസ്ഥനെ നിയോഗിച്ചു. കൊറ്റങ്കര ജോണ്സ് കശുവണ്ടി ഫാക്ടറിയിലെ ബൂത്തിലാണ് പ്രിസൈഡിങ് ഓഫീസര് അരിവാള് ചുറ്റിക നക്ഷത്രം പതിച്ച മാസ്ക് ധരിച്ച് പോളിങിനിരുന്നത്.
കോണ്ഗ്രസ്- ബിജെപി പ്രവര്ത്തകര് പ്രതികരിച്ചതോടെ പാർട്ടി നേതാക്കള് ജില്ലാ കളക്ടര് ബി അബ്ദുള് നാസറിനു മുന്നില് ചിത്രങ്ങള് സഹിതം പരാതി നല്കി. തുടര്ന്നാണ് നടപടി. ആർഡിഒ അന്വേഷിച്ച് റിപ്പോർട്ട് സമർപ്പിക്കാൻ കളക്ടർ നിർദേശം നൽകി. റിപ്പോർട്ട് കിട്ടിയ ശേഷം തെരഞ്ഞെടുപ്പ് നിയമപ്രകാരം നടപടി സ്വീകരിക്കും. ശിഖാ സുരേന്ദ്രൻ ഐഎഎസിനാണ് അന്വേഷണ ചുമതല. നിയമനടപടികളിലേക്കു നീങ്ങുമെന്ന് കോണ്ഗ്രസ് ജില്ലാ അധ്യക്ഷ ബിന്ദുകൃഷ്ണ അറിയിച്ചു.
No comments