നീറ്റ് പി.ജി പ്രവേശന പരീക്ഷ; ഓൺലൈനായി രജിസ്റ്റർ ചെയ്ത് തുടങ്ങാം

നീറ്റ് പി.ജി പ്രവശന പരീക്ഷയെഴുതാൻ ആഗ്രഹിക്കുന്ന വിദ്യാർത്ഥികൾക്ക് വെബ്സൈറ്റ് സന്ദർശിച്ച് പരീക്ഷയ്ക്കായി രജിസ്റ്റർ ചെയ്യാം. പോസ്റ്റ് ഗ്രാജ്വേറ്റ് പ്രോഗ്രാമുകളിലേക്കുള്ള പ്രവേശനത്തിനായി നടത്തുന്ന നാഷണൽ എലിജിബിലിറ്റി കം എൻട്രൻസ് ടെസ്റ്റിന്റെ രജിസ്ട്രേഷൻ നടപടികൾ നാഷണൽ ബോർഡ് ഓഫ് എക്സാമിനേഷൻസ് (എൻ.ബി.എ) ആരംഭിക്കും. ഫെബ്രുവരി 23 ന് 

3 മണിക്ക് ശേഷം ഇതിന്റെ ലിങ്ക് വെബ്സൈറ്റിൽ ആക്ടിവേറ്റ് ആകുമെന്നാണ് അറിയിപ്പ് വന്നിരിക്കുന്നത്. മാർച്ച് 15 ആണ് നീറ്റ് പി.ജി പ്രവേശ പരീക്ഷയ്ക്കായി ഓൺലൈനായി അപേക്ഷിക്കേണ്ട അവസാന തീയതി.

എം.ഡി/ എം.എസ്/ പോസ്റ്റ് ഗ്രാജ്വേറ്റ് ഡിപ്ലോമ കോഴ്സുകളിലേക്ക് പ്രവേശനം ആഗ്രഹിക്കുന്ന വിദ്യാർത്ഥികൾക്ക് നീറ്റ് പി.ജി പരീക്ഷയെഴുതാം. ഇതിനായി രജിസ്റ്റർ ചെയ്യാൻ എൻ.ബി.ഇയുടെ ഔദ്യോഗിക വെബ്സൈറ്റായ nbe.edu.in സന്ദർശിക്കുക. ഏപ്രിൽ 18നാണ് നീറ്റ് പി.ജി 2021 പ്രവേശന പരീക്ഷ. കംപ്യൂട്ടർ അധിഷ്ഠിതമായിട്ടായിരിക്കും പരീക്ഷ നടത്തുക. ഫലം മെയ് 31 ന് പ്രസിദ്ധീകരിക്കും.

മെഡിക്കൽ കൗൺസിൽ ഓഫ് ഇന്ത്യ നൽകുന്ന പ്രൊവിഷണൽ അല്ലെങ്കിൽ പെർമനന്റ് എം.ബി.ബി.എസ് സർട്ടിഫിക്കറ്റുള്ളവർക്ക് നീറ്റ് പി.ജി പ്രവേശന പരീക്ഷയെഴുതാൻ യോഗ്യതയുണ്ട്. മെഡിക്കൽ കൗൺസിൽ ഓഫ് ഇന്ത്യ അല്ലെങ്കിൽ സംസ്ഥാന മെഡിക്കൽ കൗൺസിൽ നൽകുന്ന രജിസ്ട്രേഷൻ സർട്ടിഫിക്കറ്റുമുണ്ടാകണം. നീറ്റ് പി.ജി 2021 എഴുതുന്നവർ ഒരു വർഷത്തിൽ കുറയാത്ത ഇന്റേൺഷിപ്പ് പൂർത്തീകരിച്ചിരിക്കണം. ജൂൺ 30നോ അതിന് മുമ്പോ ഇന്റേൺഷിപ്പ് കഴിഞ്ഞവരാകണം എന്നാണ് വിജ്ഞാപനത്തിൽ പറയുന്നത്.