തക്കാളി വില നൂറിൽ നിന്ന് അമ്പതിലേക്കു കുത്തനെ കുറഞ്ഞു

കാഞ്ഞങ്ങാട് : തക്കാളി വരവ്​ കൂടിയതോടെ വില കുത്തനെ കുറഞ്ഞു. ആന്ധ്ര, മഹാരാഷ്​ട്ര, കർണാടക സംസ്​ഥാനങ്ങളിൽനിന്നായി തക്കാളിയുടെ വരവ്​ കൂടിയിട്ടുണ്ട്​.  ചില്ലറ വിൽപന വില അമ്പത്തഞ്ചു രൂപയായിരുന്നു.

വടക്ക്​ കിഴക്കൻ മൺസൂൺ ശക്തിപ്പെട്ടതോടെയാണ്​ തക്കാളിക്ക്​ ക്ഷാമം അനുഭവപ്പെട്ടത്​. വരവ്​ കുറഞ്ഞതോടെ വില കുത്തനെ കൂടുകയായിരുന്നു. കൊച്ചിയിലും മറ്റു ചിലയിടങ്ങളിലും കിലോക്ക്​ നൂറ്റിനാൽപ്പതു രൂപ വരെ ഉയർന്നു. വ്യാഴാഴ്​ച ഇത്​ തൊണ്ണൂറു രൂപയായി കുറഞ്ഞു. വെള്ളിയാഴ്​ച മൊത്ത വില കിലോക്ക്​ അമ്പത്തഞ്ച് രൂപയും ചില്ലറ വിൽപന വില അറുപത് രൂപയുമായിരുന്നു. കഴിഞ്ഞ നാൽപ്പത്തെട്ടു  മണിക്കൂറിനിടെ ഒറ്റയടിക്ക്​ അമ്പതു ശതമാനത്തോളം വിലയാണ് കുറഞ്ഞത്.

ചെന്നൈ  കോയമ്പത്തൂർ, മധുര, ഡിണ്ടുഗൽ, തിരുനൽവേലി എന്നിവിടങ്ങളിലെ പച്ചക്കറി ചന്തകളിലും തക്കാളിയുടെ വരവ്​ കൂടി.

തമിഴ്​നാട്ടിൽ കനത്ത മഴ തുടരുന്നതിനാൽ നാടൻ തക്കാളി ആവശ്യമായ അളവിൽ ചന്തകളിലെത്തുന്നില്ലെന്നും വ്യാപാരികൾ അറിയിച്ചു. ഡിസംബർ അവസാനത്തോടെ തക്കാളിയുടെ വരവ്​ സാധാരണ നിലയിലാവുമെന്നാണ്​ പ്രതീക്ഷിക്കപ്പെടുന്നത്​.