ഇന്നാണാ കല്യാണം! ആലിയ ഭട്ടും രൺബീർ കപൂറും ഇന്ന് വിവാഹിതരാകും
മുംബൈ: ബോളിവുഡ് കാത്തിരുന്ന ആ താരവിവാഹം ഇന്ന്. നടൻ രൺബീർ കപൂറും നടി ആലിയാ ഭട്ടും ഇന്ന് വിവാഹിതരാകും. ബാന്ദ്രയിലെ രൺബീറിന്റെ വസതിയിൽ വച്ചാണ് ചടങ്ങുകൾ. ഇന്നലെ ഹൽദി, സംഗീത് ചടങ്ങുകൾ ഇവിടെ വച്ച് നടന്നിരുന്നു.
കരീനാ കപൂർ ,കരിഷ്മ കപൂർ അടക്കം രൺബീറിന്റെ കുടുംബാംഗങ്ങളും ബോളിവുഡിലെ സുഹൃത്തുക്കളും ചടങ്ങിനെത്തി. ഏറ്റവും അടുത്ത ബന്ധുക്കളും സുഹൃത്തുക്കളും മാത്രമാവും ഇന്നത്തെ ചടങ്ങിലും പങ്കെടുക്കുക. ഏറെ നാളത്തെ പ്രണയത്തിനൊടുവിലാണ് ഇരുവരും വിവാഹിതരാവുന്നത്. ഇന്നലെയാണ് രൺബീർ കപൂറിന്റെ അമ്മ നീതു സിംഗ് ഇരുവരുടെയും വിവാഹം ഇന്ന് നടക്കുമെന്ന് മാധ്യമങ്ങളോട് സ്ഥിരീകരിച്ചത്. സെപ്തംബറിൽ ഇരുവരും ആദ്യമായി ഒരുമിച്ച് അഭിനയിച്ച ചിത്രം റിലീസ് ബ്രഹ്മാസ്ത്ര റിലീസ് ചെയ്യാനിരിക്കുകയാണ്.
ഷാരൂഖ് ഖാൻ, ദീപിക പദുകോൺ, സഞ്ജയ് ലീല ബൻസാലി, സൽമാൻ ഖാൻ തുടങ്ങി ബോളിവുഡിലെ മുൻനിര താരങ്ങളും സംവിധായകരും വിവാഹത്തിൽ പങ്കെടുക്കും. ആകെ 450 അതിഥികളാണ് വിവാഹത്തിനെത്തുക എന്നാണ് റിപ്പോർട്ടുകൾ. ബോളിവുഡിലെ മോസ്റ്റ് വാണ്ടഡ് സെലിബ്രിറ്റി ഡിസൈനറായ സബ്യസാചി തന്നെയാണ് ആലിയയ്ക്കും വിവാഹ വസ്ത്രങ്ങൾ ഒരുക്കുന്നത്. അനുഷ്ക ശർമ, ദീപിക പദുകോൺ, പ്രിയങ്ക ചോപ്ര, കത്രീന കൈഫ് എന്നീ താരങ്ങളെല്ലാം വിവാഹ ദിനത്തിൽ ഉപയോഗിച്ചത് സബ്യസാചി തയ്യാറാക്കിയ വസ്ത്രമായിരുന്നു. വിവാഹ ദിനം ലെഹങ്കയായിരിക്കും ആലിയയുടെ വേഷം. സംഗീത്, മെഹന്ദി ചടങ്ങുകൾക്ക് മനീഷ് മൽഹോത്ര ഡിസൈൻ ചെയ്ത വേഷങ്ങളാണ് ആലിയ ധരിച്ചത്. രൺബീറിന്റെ ബന്ധുക്കൾ കൂടിയായ കരിഷ്മയും കരീനയും വിവാഹദിനം മനീഷ് മൽഹോത്ര ഡിസൈൻ ചെയ്ത വസ്ത്രങ്ങളണിഞ്ഞാകും എത്തുക
രണ്ബീറിനെ ആലിയ ആദ്യമായി കാണുന്നത് 2005-ല് പുറത്തിറങ്ങിയ ബ്ലാക്ക് എന്ന സിനിമയ്ക്കായി ഓഡിഷന് ചെയ്തപ്പോഴായിരുന്നു. രണ്ബീര് ചിത്രത്തിന്റെ സംവിധാകന് സഞ്ജയ് ലീല ബന്സാലിയുടെ അസിസ്റ്റന്റായി പ്രവര്ത്തിക്കുകയായിരുന്നു ആ സമയത്ത്. വര്ഷങ്ങള്ക്ക് ശേഷം ആലിയയും സിനിമയില് അരങ്ങേറി. രണ്ടു പേരും സൂപ്പര് താരങ്ങളായി മാറുകയും ചെയ്തു.
2017-ല് രണ്ബീറിനേയും ആലിയയേയും നായകനും നായികയുമാക്കി അയാന് മുഖര്ജി സിനിമയൊരുക്കാന് തീരുമാനിച്ചിരുന്നു. ബ്രഹ്മാസ്ത്രയെന്ന ഈ ചിത്രത്തിന്റെ ചിത്രീകരണത്തിനിടെയാണ് രണ്ബീറും ആലിയയും അടുക്കാന് ആരംഭിക്കുന്നത്. ബള്ഗേറിയയിലെ ചിത്രീകരണ സമയത്തിനിടെയായിരുന്നു രണ്ബീറും ആലിയയും പ്രണയത്തിലായതെന്നാണ് റിപ്പോർട്ടുകൾ. അധികം വൈകാതെ തന്നെ രണ്ബീറും ആലിയയും പ്രണയത്തിലാണെന്ന വാര്ത്ത സോഷ്യല് മീഡിയയിലും മാധ്യമങ്ങളിലും നിറയുകയായിരുന്നു. പിന്നീട് 2018 ല് രണ്ബീറും ആലിയയും സോനം കപൂറിന്റെ വിവാഹത്തിന് ഒരുമിച്ച് എത്തിയതോടെ ആ പ്രണയം അവര് പരസ്യമാക്കുകയും ചെയ്തു.
''ഞാനെന്നേ രൺബീറുമായി വിവാഹം കഴിച്ച് ജീവിക്കുകയാണ്, എന്റെ മനസ്സിൽ'', എന്ന് തന്റെ ഏറ്റവും പുതിയ ചിത്രമായ ഗംഗുഭായ് കത്തിയവാഡിയുടെ പ്രൊമോഷനിടെ ആലിയ പറഞ്ഞത് മാധ്യമങ്ങൾ ഏറെ ആഘോഷിച്ചിരുന്നു. ദീപികയുടെയും രൺവീറിന്റെയും സോനത്തിന്റെയും വിരുഷ്കയുടെയും കത്രീന - വിക്കിയുടെയും വിവാഹശേഷം മറ്റൊരു താരവിവാഹത്തിന് കൂടി ബോളിവുഡ് വേദിയാകുന്നു.
No comments