മിന്നൽ പരിശോധനയിലൂടെ ബ്രൗൺ ഷുഗറുമായി മൂന്ന് പേരെ നീലേശ്വരം പോലീസ് അറസ്റ്റ് ചെയ്തു
കാസർഗോഡ് : ജില്ലാ പോലീസ് മേധാവി ഡോ: വൈഭവ് സക്സേന ഐ പി എസ്സിന്റെ നേതൃത്വത്തിൽ നടന്നു വരുന്ന ഓപ്പറേഷൻ ക്ലീൻ കാസറഗോഡിന്റെ ഭാഗമായി നടത്തിയ മിന്നല്പരിശോധനയിൽ 30 ഗ്രാം ബ്രൗൺഷുഗറുമായി 3 പേർ പിടിയിലായി. കാസർഗോഡ് നിന്നും മലപ്പുറത്തേക്ക് കടത്തുകയായിരുന്ന ബ്രൗൺഷുഗറുമായി പ്രതികളായ മുഹമ്മദ് അജ്മൽ എന് ( 26) ,കൊണ്ടോട്ടി , അൻസിൽ എന് അരീക്കോട് (22) , മുഹമ്മദ് ഫൈജാസ് മലപ്പുറം (22) എന്നിവരെയാണ് പോലീസ് അറസ്റ്റ് ചെയ്തത്. KL 59 Q 7329 BREEZZA കാറാണ് പ്രതികൾ ബ്രൗൺഷുഗർ കടത്താൻ ഉപയോഗിച്ചത്. നീലേശ്വരം പള്ളിക്കര ജംഗ്ഷനിൽ വെച്ചാണ് പ്രതികളെ കാഞ്ഞങ്ങാട് ഡി വൈ എസ് പി പി ബാലകൃഷ്ണൻ നായർ , ഇൻസ്പെക്ടർ ശ്രീഹരി കെ.പി , സബ് ഇൻസ്പെക്ടർ ശ്രീജേഷ് , എന്നിവരുടെ നേതൃത്വത്തിലുള്ള സംഘം രാവിലെ 11.30 ന് അറസ്റ്റ് ചെയ്തത്. നീലേശ്വരം പോലീസ് സ്റ്റേഷനിലെ പോലീസ് ഉദ്യോഗസ്ഥരായ ഗീരിശൻ എം.വി , പ്രദീപൻ കെ.വി , വിനോദ് K, പ്രഭേഷ്കുമാർ, അമൽ രാമചന്ദ്രൻ , മനു എന്നിവരും പ്രതികളെ പിടികൂടിയ സംഘത്തിലുണ്ടായിരുന്നു. ലഹരിക്കെതിരെ ബോധവൽക്കരണത്തോടൊപ്പം ശക്തമായപരിശോധനകളും നടപടികളുമായി മുന്നോട്ട് പോവുകയാണ് നീലേശ്വരം പോലീസ്. രണ്ടു ദിവസത്തിനുള്ളിലെ രണ്ടാമത്തെ ലഹരി വേട്ടയാണ് നീലേശ്വരം പോലീസിന്റേത്.
No comments