ചെറുപുഴ പ്രപ്പൊയിലില്‍ വീണ്ടും 16 ദിവസത്തിനു ശേഷം ബ്ലാക്ക്മാന്റെ സാന്നിധ്യം

ചെറുപുഴ : ഇടവേളയ്ക്കു ശേഷം ബ്ലാക്ക്മാൻ വീണ്ടും ചുവരെഴുത്തുമായെത്തി. പ്രാപ്പൊയിൽ ഈസ്റ്റിൽ കൂലോത്തുംപൊയിൽ ജലനിധിക്ക് സമീപത്തെ കളപ്പുരയ്ക്കൽ ജോസഫിന്റെ വീടിന്റെ ഭിത്തിയിലാണ് ചുവരെഴുത്തുള്ളത്. ബ്ലാക്ക്മാനെന്ന് മൂന്നുപ്രാവശ്യം എഴുതി മനുഷ്യന്റെ കാരിക്കേച്ചറും വരച്ച് ചേർത്തിട്ടുണ്ട്. ഞായറാഴ്ച പുലർച്ചെ മുറ്റത്തുകൂടി ആരോ നടക്കുന്ന ശബ്ദം ഗൃഹനാഥൻ കേട്ടിരുന്നു.

ജൂലായ് ആദ്യം ആലക്കോട് രയരോത്താണ് ആദ്യം അജ്ഞാതൻ പ്രത്യക്ഷപ്പെട്ടത്. ചെറുപുഴ പോലീസ് സ്റ്റേഷൻ പരിധിയിലെ എയ്യൻകല്ലിലും പ്രാപ്പൊയിൽ ഈസ്റ്റിലും ജൂലായ് 22-നാണ് കതകിൽ തട്ടിവിളിച്ച് ബഹളമുണ്ടാക്കി. പിന്നീടങ്ങോട്ട് കതകിൽ തട്ടിയും ബ്ലാക്ക്മാൻ എന്ന് ചുവരുകളിൽ എഴുതിയും ചിത്രംവരച്ചും കൂവിവിളിച്ചും ജനങ്ങളിൽ ഭീതിപരത്തിയ അജ്ഞാതനെ നാട്ടുകാരും പോലീസും കിണഞ്ഞുപരിശ്രമിച്ചിട്ടും പിടികൂടാനായില്ല. ഓഗസ്റ്റ് അഞ്ചിനാണ് ഇതിനുമുൻപ്‌ ചുവരെഴുത്ത് നടത്തിയത്. പിന്നീട് 16-ാമത്തെ ദിവസമാണ് ഇയാൾ വീണ്ടും പ്രത്യക്ഷപ്പെട്ടത്.