കണ്ണൂരിലെ കവർച്ച ചിററാരിക്കാൽ സ്വദേശിയായ കുപ്രസിദ്ധ മോഷ്ടാവ് അറസ്റ്റിൽ

കണ്ണൂർ: കണ്ണൂർ ജില്ലാ ആശുപത്രി പരിസരത്ത് നിർത്തിയിട്ട ഓട്ടോ ടാക്സി കുത്തിതുറന്ന് പണവും സ്വർണ്ണവും കവർന്ന കേസിൽ കുപ്രസിദ്ധ മോഷ്ടാവ് ചിറ്റാരിക്കാൽ ആയന്നൂരിലെ ഷൈജു ജോസഫിനെ (40) സിറ്റി പോലീസ് സ്റ്റേഷനിലെ എസ്.ഐ.പമോദും സംഘവും അറസ്റ്റു ചെയ്തു.

കഴിഞ്ഞ ദിവസം പുലർച്ചെയാണ് ജില്ലാ ആശുപത്രി പരിസരത്ത് നിർത്തിയിട്ട് ഏച്ചൂർ സ്വദേശി ഈച്ചക്കുന്നത്ത് ഹൗസിൽ ജി മനോജിന്റെ ഓട്ടോ ടാക്സിയുടെ  ഡാഷ് ബോക്സ് തകർത്ത് അകത്ത് സൂക്ഷിച്ചിരുന്ന കാൽപവന്റെ കമ്മലും മൂവായിരം രൂപയും എടിഎം കാർഡും കവർന്നത്. പരാതിയിൽ കേസെടുത്ത സിറ്റി പോലീസ് അന്വേഷണത്തിനിടെ സിസിടിവി ക്യാമറയിൽ നിന്നുമാണ് പ്രതിയെകുറിച്ച് സൂചന ലഭിച്ചത്. അറസ്റ്റുചെയ്ത ജോസഫിൽ നിന്നും രണ്ട് ഫോണും മോഷണം പോയ എ ടി എം കാർ ഡും മൂന്ന് പേഴ്സും ആറ് സ്പോർട്സ് പാന്റ് സും പിടികൂടി. ടൗണിലെ കടയിൽ നിന്നും മോഷ്ടിച്ച സാധനങ്ങളും കണ്ടെടുത്തു. അറസ്റ്റിലായ പ്രതിയെ ഇന്ന് കോടതിയിൽ ഹാജരാക്കും. കണ്ണൂർ, കാസർകോട് ജില്ലകളിലെ നിരവധി കവർച്ചാകേസുകളിലെ പ്രതിയാണ് ജോസഫെന്ന് പോലീസ് പറഞ്ഞു.