ഫ്ലൈറ്റിൽ വെച്ച് ദേഹാസ്വാസ്ഥ്യം; ആശുപത്രിയിൽ പ്രവേശിപ്പിച്ച നീലേശ്വരം സ്വദേശി മരിച്ചു

നീലേശ്വരം: കുവൈറ്റിലേക്കുള്ള യാത്രയ്ക്കിടെ ഫ്ലൈറ്റിൽ ദേഹാസ്വാസ്ഥ്യമുണ്ടായതിനെ തുടർന്ന് ആശുപത്രിയിൽ പ്രവേശിപ്പിച്ച നീലേശ്വരം സ്വദേശി മരിച്ചു.തൈക്കടപ്പുറം കടിഞ്ഞിമൂലയിലെ പുതിയ പാട്ടില്ലത്ത് അബ്ദുൽസലാം (65) ആണ് ബഹറിനിലെ ഹമദ് ആശുപത്രിയിൽ മരിച്ചത്. ഇന്നലെ വൈകിട്ട് കണ്ണൂർ വിമാനത്താവളത്തിൽ നിന്ന് കുവൈറ്റിലേക്ക് പുറപ്പെട്ട എയർ ഇന്ത്യ എക്സ്പ്രസ് വിമാനത്തിലെ യാത്രക്കാരനായിരുന്നു ഇദ്ദേഹം.വിമാന യാത്രയ്ക്കിടെ ദേഹാസ്വാസ്ഥ്യം ഉണ്ടായതിനാൽ വിമാനം അടിയന്തരമായി ബഹ്റിൻ അന്താരാഷ്ട്ര വിമാനത്താവളത്തിൽ ഇറക്കുകയായിരുന്നു. ഉടൻ ബഹറിനിലെ ഹമദ് ആശുപത്രിയിൽ പ്രവേശിപ്പിച്ചെങ്കിലും മരിച്ചു. മൃതദേഹം ഇതേ ആശുപത്രിയിൽ സൂക്ഷിച്ചിരിക്കുകയാണ്. ബഹറിൻ കെഎംസിസിയുടെ നേതൃത്വത്തിൽ നാട്ടിലെത്തിക്കാനുള്ള നടപടിക്രമങ്ങൾ പുരോഗമിക്കുന്നുണ്ട്.

പരേതനായ പി.പി.സി.അബ്ദുല്ലയുടെയും പുതിയപാട്ടില്ലത്ത് ആയിഷയുടെയും മകനാണ് അബ്ദുൽസലാം. ഭാര്യ: താഹിറ. മക്കൾ: ഡോ. ആദിൽ, മുബഷീർ, ഖദീജ, അബ്ദുല്ല, മുഹമ്മദ്. മരുമക്കൾ: ഡോ.സുബൈർ, ഡോ. സഫീദ.സഹോദരങ്ങൾ: അഹമ്മദ്, സിദ്ദിഖ്, റഫീഖ്, ബീഫാത്തിമ, സീനത്ത്.