കോടികളുടെ എം ഡി എം എ പിടികൂടിയ കേസ്; മുഖ്യപ്രതി കണ്ണൂരിലെ നൗഫലിനുവേണ്ടി ലുക്ക്ഔട്ട് നോട്ടീസ്

കോഴിക്കോട്: കരിപ്പൂരിൽ ഒരു കിലോ എം ഡി എം എ പിടികൂടിയ കേസിലെ പ്രധാനപ്രതിക്കു പൊലീസ് ലുക്ക്ഔട്ട് നോട്ടീസ് പുറപ്പെടുവിച്ചു. കണ്ണൂർ സ്വദേശിയും ഒമാനിൽ ജോലി ചെയ്യുന്ന ആളുമായ നൗഫലിനുവേണ്ടിയാണ് ലുക്കൗട്ട് നോട്ടീസ് പുറപ്പെടുവിച്ചത്.

വിദേശത്തു നിന്നു കഴിഞ്ഞ ദിവസം കരിപ്പൂർ വിമാനത്താവളത്തിലെത്തിയ പത്തനംതിട്ട സ്വദേശിനി സൂര്യ, എം ഡി എം എ കൈപ്പറ്റാനെത്തിയ മലപ്പുറം തിരൂരങ്ങാടിയിലെ അലി അക്ബർ, മുഹമ്മദ് റാഫി, സി പി ഷഫീർ എന്നിവരെ തൊണ്ടിയോടെയാണ് പിടികൂടിയത്. സൂര്യക്കു വിസിറ്റിംഗ് വിസയും പണവും നൽകി ഒമാനിലെത്തിച്ചത് നൗഫലാണെന്നു ഡാൻസാഫ് സ്ക്വാഡ് കണ്ടെത്തിയിരുന്നു. പ്രതികൾ സഞ്ചരിച്ചിരുന്ന കാറും

കസ്റ്റഡിയിലെടുത്തിരുന്നു. ഇവരുടെ ഫോണുകൾ പൊലീസ് പരിശോധിച്ചിട്ടുണ്ട്. കോടികൾ വിലമതിക്കുന്ന മയക്കുമരുന്നാണ് ഇവരിൽ നിന്നു പിടികൂടിയത്. നൗഫലിനെ നാട്ടിലെത്തിക്കുന്നതിനു ഡാൻസാഫ് സംഘം ശക്തമായി നടപടികളാരംഭിച്ചിട്ടുണ്ട്.