അന്തർദേശീയ ആദിവാസി ദിനാചരണത്തിന്റെ ഭാഗമായി പരപ്പയിൽ ഗോത്രബന്ധു നേതൃസംഗമവും സെമിനാറും സംഘടിപ്പിച്ചു

പരപ്പ : അന്തർദേശീയ ആദിവാസി ദിനാചരണത്തിന്റെ ഭാഗമായി പരപ്പയിൽ വിവിധ ആദിവാസി സംഘടനകളുടെ നേതൃത്വത്തിൽ ഗോത്രജന സംഗമവും സെമിനാറും സംഘടിപ്പിച്ചു.  പരപ്പ വൈഎംസിഎ ഹാളിൽ ഉണർത്തുപാട്ടോടെ പരിപാടികൾക്ക് തുടക്കം കുറിച്ചു. ഡോക്ടർ ബാബാസാഹിബ് അംബേദ്കർ, മഹാത്മ അയ്യങ്കാളി എന്നിവരുടെ ഛായാ ചിത്രത്തിന് മുന്നിൽ ദീപം തെളിയിച്ച് പുഷ്പാർച്ചന നടത്തിക്കൊണ്ട് വിവിധ സംഘടനാ നേതാക്കളും ഊരു മൂപ്പന്മാരും ചേർന്ന് ഉദ്ഘാടനം നിർവഹിച്ചു. 

ഉദ്ഘാടന സമ്മേളനത്തിൽ സംഘാടകസമിതി കൺവീനർ രാഘവൻ അടുക്കം സ്വാഗതം പറഞ്ഞു സംഘാടകസമിതി ചെയർമാൻ കമലാക്ഷന്‍ കക്കോൽ അധ്യക്ഷത വഹിച്ചു വർക്കിംഗ് ചെയർമാൻ രമ്യ ബാലകൃഷ്ണൻ നന്ദി പറഞ്ഞു. തുടർന്ന് നടന്ന സെമിനാറിൽ 'ജാതിവ്യവസ്ഥയും അധികാരവും: ഇന്നലെ ഇന്ന് നാളെ' എന്ന വിഷയത്തിൽ പ്രശസ്ത വാഗ്മിയും

സംസ്‌കൃതപണ്ഡിതനും ദളിത് ചിന്തകനും എഴുത്തുകാരനുമായ ഡോ. ടി.എസ് ശ്യാംകുമാർ പ്രഭാഷണം നടത്തി. പ്രോഗ്രാം കമ്മിറ്റി ചെയർമാൻ ജയചന്ദ്രൻ ചാമക്കുഴി മോഡറേറ്ററായി. പ്രോഗ്രാം കമ്മിറ്റി കൺവീനർ സതീശൻ മാസ്റ്റർ സ്വാഗതവും വർക്കിംഗ് ചെയർമാൻ മധു മെമ്പർ നന്ദിയും പറഞ്ഞു. ഉച്ചയ്ക്കുശേഷം നടന്ന സെമിനാറിൽ 'ഇന്ത്യൻ ഭരണഘടനയും സംവരണവും നേരിടുന്ന വെല്ലുവിളികൾ' എന്ന വിഷയത്തിൽ ഡോക്ടർ മാളവിക ബിന്നി വിഷയാവതരണം നടത്തി സംസാരിച്ചു. പി കെ രാമചന്ദ്രൻ മോഡറേറ്ററായി പ്രോഗ്രാം കമ്മിറ്റി കൺവീനർ രതീഷ് കാട്ടുമാടം സ്വാഗതവും സംഘാടകസമിതി ട്രഷറർ ടി ചന്ദ്രകുമാർ നന്ദിയും പറഞ്ഞു.

മുതിർന്ന മംഗലംകളി കലാകാരന്മാരായ ഉബിച്ചിയമ്മ, കൊച്ചു വെളുത്തൻ വിശിഷ്ട ക്ഷണിതാക്കളായി. കാസർകോട് തുടി സാംസ്കാരിക സമിതിക്ക് വേണ്ടി ഡോക്ടർ വി ബാലകൃഷ്ണൻ, ദ്രാവിഡ ഗോത്രകല അക്കാദമിക്ക് വേണ്ടി ശിവദാസൻ ചുള്ളിക്കര, ഗോത്രബന്ധു തായന്നൂരിന് വേണ്ടി പത്മനാഭൻ കൂളിമാവ്, പിആർഡിഎസിന് വേണ്ടി സുരേന്ദ്രൻ കാലിക്കടവ്, എംപിഎംഎസ് ജില്ലാ കമ്മിറ്റി അംഗം ബിജു മുടന്തേൻപാറ, എ കെ എം എസ് പ്രതിനിധി കുഞ്ഞിക്കണ്ണൻ പൂക്കുന്നം, വേടൻ ഫാൻസിനെ പ്രതിനിധീകരിച്ച് രാകേഷ് മാലോം മംഗളംകളി അക്കാദമിക്ക് വേണ്ടി കണ്ണൻ ആനപ്പെട്ടി തുടങ്ങിയവർ സെമിനാറിലും ചർച്ചയിലും പങ്കെടുത്തു.