പയ്യന്നൂർ മാതമംഗലത്ത് പെരുമ്പാമ്പിനെ പിടികൂടി ചില്ലിയാക്കി കഴിച്ച യുവാക്കളെ ഫോറസ്റ്റ് അധികൃതർ അറസ്റ്റു ചെയ്തു

പയ്യന്നൂർ: പെരുമ്പാമ്പിനെ പിടികൂടി ചില്ലിയാക്കി കഴിച്ച യുവാക്കളെ ഫോറസ്റ്റ് അധികൃതർ അറസ്റ്റു ചെയ്തു. പാണപ്പുഴ, മുണ്ടപ്പുറം, ഉറുമ്പിൽ ഹൗസിൽ യു. പ്രമോദ് (40), ചന്ദനം ചേരി ഹൗസിൽ സി ബിനീഷ് (37) എന്നിവരെയാണ് തളിപ്പറമ്പ് ഫോറസ്റ്റ് റേഞ്ച് ഓഫീസർ പി.ബി സനൂപ് കുമാറും സംഘവും പിടികൂടിയത്. മാതമംഗലം, കുറ്റൂരിൽ നിന്നാണ് ഇരുവരും ചേർന്ന് പെരുമ്പാമ്പിനെ പിടികൂടിയത്. വീട്ടിലെത്തിച്ച് മുറിച്ച് ഇറച്ചിയാക്കിയ ശേഷം ചില്ലിയാക്കുകയായിരുന്നു. ഇതിനിടയിലാണ് ഫോറസ്റ്റ് അധികൃതർക്ക് വിവരം ലഭിച്ചത്. വനപാലകർ വീടു വളഞ്ഞ് അകത്തു കയറുമ്പോൾ 'പെരുമ്പാമ്പ് ചില്ലി കഴിച്ചു കൊണ്ടിരിക്കുകയായിരുന്നു ഇരുവരും. സംരക്ഷിത വിഭാഗത്തിൽപ്പെടുന്ന പെരുമ്പാമ്പിനെ പിടികൂടുന്നത് ഇന്ത്യൻ വന നിയമപ്രകാരം ഏഴു വർഷം കഠിന തടവും പിഴയും കിട്ടാവുന്ന കുറ്റകൃത്യമാണ്.