ചീമേനി ഗവ.ഹയർ സെക്കണ്ടറി സ്കൂളിൽ ഒരു കോടി രൂപ ചിലവിൽ കളിക്കളം നിർമ്മിച്ചതിൽ വൻ അഴിമതി നടന്നുവെന്ന ആരോപണവുമായി കോൺഗ്രസ് മണ്ഡലം കമ്മിറ്റി

ചെറുവത്തൂർ: സംസ്ഥാന സർക്കാരിന്റെ ഒരു പഞ്ചായത്തിൽ ഒരു കളിക്കളം പദ്ധതിയിൽ ഉൾപ്പെടുത്തി കയ്യൂർ- ചീമേനി ഗ്രാമ പഞ്ചായത്തിലെ ചീമേനി ഗവ.ഹയർ സെക്കണ്ടറി സ്കൂളിൽ ഒരു കോടി രൂപ ചിലവിൽ കളിക്കളം നിർമ്മിച്ചതിൽ വൻ അഴിമതി നടന്നുവെന്ന ആരോപണവുമായി കോൺഗ്രസ് മണ്ഡലം കമ്മിറ്റി. 50 ലക്ഷം രൂപ വീതം കായിക വകുപ്പിൽ നിന്നും എംഎൽഎ ഫണ്ടിൽ നിന്നും ചെലവഴിച്ചു നിർമിക്കുന്ന കളിക്കളത്തിന് 25 ലക്ഷം രൂപ പോലും ചിലവാക്കിയിട്ടില്ലെന്ന് കോൺഗ്രസ് ആരോപിച്ചു. നിർമ്മാണത്തിലെ അഴിമതി അന്വേഷിക്കണമെന്നും 21 ന് മന്ത്രി എ അബ്ദുൾ റഹ്മാൻ ഗ്രൗണ്ടിന്റെ ഉദ്ഘാടനം നടത്തുന്നത് മാറ്റിവെക്കണമെന്നും കോൺഗ്രസ് ചീമേനി മണ്ഡലം കമ്മിറ്റി ഭാരവാഹികൾ വാർത്ത സമ്മേളനത്തിൽ പറഞ്ഞു. ഫുട്ബോൾ, വോളിബോൾ കോർട്ടുകൾ, ഹാൻഡ്ബോൾ കോർട്ട്,

പരിശീലന സൗകര്യങ്ങൾ, വയോജനങ്ങൾക്ക് നടത്തത്തിനുള്ള സൗകര്യം, കളിക്കാർക്കുള്ള വിശ്രമ സ്ഥലം തുടങ്ങി വിവിധ പദ്ധതികളാണ് നിർദേശിച്ചിട്ടുള്ളത്. എന്നാൽ മൈതാനത്തിന്റെ നാല് ഭാഗത്തും നെറ്റ് കെട്ടുകയും കിഴക്ക് ഭാഗത്തായി 50 മീറ്റർ നീളത്തിൽ ഇരിപ്പിട സൗകര്യം ഒരുക്കുകയും മാത്രമാണ് ചെയ്തിട്ടുള്ളത്. നിർമ്മാണത്തിന്റെ ആദ്യഘട്ടം മുതൽ ശരിയായ രീതിയിൽ ആയിരുന്നില്ല പ്രവൃത്തി നടന്നതെന്നാണ് ആരോപണം. ഉദ്ഘാടനത്തിനുള്ള സംഘാടക സമിതി രൂപീകരണ യോഗത്തിന് എത്തിയവർ പണി പൂർത്തിയാക്കാതെ ഉദ്ഘാടനം ചെയ്യുന്നതിനെ എതിർത്തിരുന്നു. ഈ വിഷയം പൊതുജനങ്ങൾ ശ്രദ്ധയിൽപ്പെടുത്തിയതിന്റെ ഭാഗമായി ഗ്രൗണ്ട് സന്ദർശിച്ചപ്പോൾ നാലിൽ ഒന്ന് രൂപ പോലും ചെലവാക്കിയിയിട്ടില്ലെന്ന് കണ്ടെത്തുകയായിരുന്നു. ഗ്രൗണ്ടിന്റെ നിർമാണം തുടക്കം മുതലേ സുതാര്യമല്ലെന്ന് അഭിപ്രായമുയർന്നിരുന്നു. സ്കൂളിലെ രക്ഷിതാവ് വിവരാവകാശ രേഖയായി നിർമ്മാണത്തിന്റെ എസ്റ്റിമേറ്റ് ചോദിച്ചപ്പോൾ ലഭ്യമല്ലെന്നായിരുന്നു മറുപടി. ഇത് അഴിമതി മൂടിവെക്കുന്നതിന്റെ ഭാഗമായിരുന്നു. തിരഞ്ഞെടുപ്പ് മുന്നിൽ കണ്ടുകൊണ്ടുള്ള ഉദ്ഘാടനം ജനങ്ങളോടുള്ള വെല്ലുവിളിയാണ്. ഒരു നാടിന്റെ പൊതുസ്വത്താവേണ്ട കളിക്കളം ഏറ്റവും ഭംഗിയോടെയും കൃത്യതയോടെയും പൂർത്തിയാക്കിയതിന് ശേഷം മാത്രം ഉദ്ഘാടനം നടത്തിയാൽ മതിയെന്നാണ് കോൺഗ്രസ് പറയുന്നത്. നിർമ്മാണത്തിലെ അപാകതകൾ സംബന്ധിച്ച് വകുപ്പ് മന്ത്രിക്കും, വിജിലൻസിനും ചീമേനി മണ്ഡലം കോൺഗ്രസ് കമ്മിറ്റി പരാതി നൽകിയിട്ടുണ്ട്. രാജ്മോഹൻ ഉണ്ണിത്താൻ എംപി നൽകുന്ന ഹൈമാസ്റ്റ് ലൈറ്റുകൾക്ക് പഞ്ചായത്ത് ഇപ്പോൾ അനുമതി നൽകുന്നില്ല. പഞ്ചായത്തിന്റെ ഈ നടപടിയും പ്രതിഷേധാർഹമാണെന്ന് ഭാരവാഹികൾ പറഞ്ഞു. വാർത്ത സമ്മേളനത്തിൽ മണ്ഡലം പ്രസിഡന്റ് എ. ജയരാമൻ, ഐ.എൻ.ടി.യു.സി സംസ്ഥാന കമ്മിറ്റി അംഗം ടി.വി കുഞ്ഞിരാമൻ, ബ്ലോക്ക് വൈസ് പ്രസിഡന്റുമാരായ ടി.പി ധനേഷ്, ടി പി ശ്രീവത്സൻ പങ്കെടുത്തു.