പീഡനക്കേസിൽ ഒളിവിൽ പോയ പ്രതി 11 വർഷത്തിന് ശേഷം വിമാനത്താവളത്തിൽ പിടിയിൽ ചെമ്മനാട് സ്വദേശിയാണ് പിടിയിലായത്

കാസർകോട്: പീഡനക്കേസിൽ ഒളിവിൽ പോയ പ്രതി 11 വർഷത്തിന് ശേഷം വിമാനത്താവളത്തിൽ പിടിയിൽ. ചെമ്മനാട് സ്വദേശി അബ്ദുൽ ഷഹീലിനെയാണ് വിദ്യാനഗർ പി ഷൈൻ, എസ്ഐ സഫ് വാൻ എന്നിവരുടെ നേതൃത്വത്തിലുള്ള സംഘം ലഖ്നൗവിലെ വിമാനത്താവളത്തിൽ വച്ച് പിടികൂടിയത്. 2014ൽ സ്റ്റേഷൻ പരിധിയിലെ ഒരു യുവതിയെ ഇയാൾ പീഡിപ്പിച്ചിരുന്നു. വിചാരണ വേളയിൽ കോടതിയിൽ ഹാജരാകാതെ ഇയാൾ വിദേശത്തേയ്ക്ക് കടക്കുകയായിരുന്നു. തുടർന്ന് പ്രതിക്കെതിരെ പൊലീസ് ലുക്കൗട്ട് നോട്ടീസ് പുറപ്പെടുവിച്ചിരുന്നു. വർഷങ്ങൾക്ക് ശേഷമാണ് നാട്ടിലേക്ക് മടങ്ങി വരുന്നത്. വെള്ളിയാഴ്ച ലഖ്നൗ ചൗധരി ചരൺസിങ് അന്താരാഷ്ട്ര വിമാനത്താവളത്തിൽ എത്തിയപ്പോൾ അധികൃതർ തടഞ്ഞുവക്കുകയായിരുന്നു. പ്രതിയെ നാട്ടിലെത്തിച്ച് കോടതിയിൽ ഹാജരാക്കും.