പുല്ലൂര്‍ കൊടവലത്തെ കുളത്തില്‍നിന്ന് വനപാലകര്‍ രക്ഷിച്ച പുലിയെ ചികിത്സയ്‌ക്കായി തൃശൂർ പുത്തൂർ മൃഗശാലയിലെത്തിച്ചു

കാഞ്ഞങ്ങാട്പുല്ലൂർ കൊടവലത്തെ സ്വകാര്യവ്യക്തിയുടെ പറമ്പിലെ കുളത്തിൽ നിന്ന് വനപാലകർ രക്ഷപ്പെടുത്തിയ ഒരു വയസ്സുള്ള പുലിയെ കാഞ്ഞങ്ങാട് ഫോറസ്റ്റ് റെയ്ഞ്ച് ഓഫീസിൽനിന്ന് വിദഗ്ധ ചികിത്സക്ക് തൃശൂരിൽ എത്തിച്ചു. ഫോറസ്റ്റ് ഓഫീസിന് പിറകിലെ കെട്ടിടത്തിന് സമീപം കൂട്ടിൽ സംരക്ഷിച്ച പുലിയെ ചൊവ്വാഴ്ച രാത്രി 10.30 ഓടെ പ്രത്യേക വാഹനത്തിലാണ് തൃശൂരിലേക്ക് കൊണ്ടുപോയത്. ബുധനാഴ്ച രാവിലെ പുലിയെ വിദഗ്ധ ചികിത്സക്കായി പുത്തൂർ മൃഗശാലയോടനുബന്ധിച്ചുള്ള ആശുപ്രതിയിലേക്ക് മാറ്റി. ഞായറാഴ്ച വൈകിട്ട് കൊടവലത്തെ മധുവിന്റെ പറമ്പിലെ കുളത്തിലാണ് പുലിയെ കണ്ടത്. വനം വകുപ്പ് അധികൃതർ പൊലീസിന്റെയും നാട്ടുകാരുടെയും സഹായത്തോടെ അന്ന് രാത്രിതന്നെ പുലിയെ കുളത്തിൽ നിന്നും പുറത്തെടുത്ത് കൂട്ടിലാക്കിയ ശേഷം കാഞ്ഞങ്ങാട്ടെ ഫോറസ്റ്റ് റെയ്ഞ്ച് ഓഫീസിലേക്ക് കൊണ്ടുപോകുകയായിരുന്നു. പരിശോധനയിൽ പുലിയുടെ കൈവിരലുകളിലെ നഖങ്ങൾ അറ്റുപോയതായും ദേഹത്ത് ചില ഭാഗങ്ങളിൽ പരിക്കുള്ളതായും കണ്ടെത്തി. ഈ സാഹചര്യത്തിൽ ഡോക്ടറുടെ നിർദേശപ്രകാരം നടപടി ക്രമങ്ങൾ പൂർത്തിയാക്കിയ ശേഷമാണ് തൃശൂരിലേക്ക് കൊണ്ടുപോയത്.