കാസർകോട് വികസന പാക്കേജിലൂടെ പുതുവർഷത്തിൽ ഉദ്ഘാടനത്തിന് തയ്യാറായി 39 കോടി രൂപയുടെ 24 പദ്ധതികൾ

കാസർകോട് കാസർകോട് വികസന പാക്കേജിലൂടെ പുതുവർഷത്തിൽ ഉദ്ഘാടനത്തിന് തയ്യാറായി 39 കോടി രൂപയുടെ 24 പദ്ധതികൾ. ആരോഗ്യ, വിദ്യാഭ്യാസ മേഖലയിലുള്ള പദ്ധതികളും പാലം, റോഡുകൾ, ജലവിതരണം, സ്മാർട്ട് അംഗൻവാടികൾ, ടൂറിസം മേഖലകളിൽ ഭൗതികസാഹചര്യങ്ങൾ ഉൾപ്പെടെയുള്ള പദ്ധതികളുമാണ് ഉദ്ഘാടനത്തിനൊരുങ്ങിയത്. ആരോഗ്യ മേഖലയിൽ ആറു കോടി പ്രാഥമിക, കുടുംബരോഗ്യ കേന്ദ്രങ്ങളുടെ അടിസ്ഥാന സൗകര്യ വികസനത്തിന്റെ ഭാഗമായി ബന്തടുക്ക, മാവിലാകടപ്പുറം എന്നീ പ്രാഥമികാരോഗ്യകേന്ദ്രങ്ങൾക്കായി യഥാക്രമം 1.68 കോടി, ഒരു കോടി രൂപയുടെ പ്രവൃത്തികളാണ് പൂർത്തീകരിച്ചത്. വിദ്യാലയങ്ങൾക്ക് 2.91 കോടിഅടിസ്ഥാനസൗകര്യ വികസനത്തിനായി തെക്കിൽ പറമ്പ് ഗവ. യുപി സ്കൂളിൽ 2.11 കോടി രൂപ, മംഗൽപാടി ഗവ. ഹയർ സെക്കൻഡറി സ്കൂളിൽ 1.41 കോടി, ഷിറിയ ഗവ. ഹയർസെക്കൻഡറി സ്കൂളിൽ 60 ലക്ഷം, പെരുത്തടി ഗവ. എൽപി സ്കൂൾ 73 ലക്ഷം എന്നീ പ്രവൃത്തികളാണ് പൂർത്തിയായത്. ബന്തടുക്ക ഗവ. ഹയർ സെക്കൻഡറി സ്കൂളിൽ 28.8 ലക്ഷം രൂപയുടെ

പാചകപ്പുരയും പെർഡാല ഗവ. ഹൈസ്കൂളിൽ 20 ലക്ഷം രൂപയുടെ പാചകപ്പുരയും കാസർകോട് വികസന പാക്കേജിലൂടെ ഉദ്ഘാടനത്തിന് തയ്യാറായി. 2.74 കോടി രൂപയുടെ കുമ്പള റൂറൽ ടൂറിസം പദ്ധതിയും കാഞ്ഞങ്ങാട് നമ്പ്യാർക്കല്ലിൽ 1.13 കോടിയുടെ റിവർ വ്യൂ പാർക്കുമാണ് ടൂറിസം മേഖലയിൽ പൂർത്തിയായ പദ്ധതികൾ. കാഞ്ഞങ്ങാട്- - കാസർകോട് സംസ്ഥാന പാത വികസനത്തിന്റെ ഭാഗമായി 4.99 കോടിയുടെ പ്രവൃത്തികളും, കുമ്പളപ്പള്ളി- - ഉമിച്ചിപ്പൊയിൽ ഉന്നതി റോഡിനായി 4.99 കോടിയുടെ പ്രവൃത്തിയും പൂർത്തിയായി. മീഞ്ച, പൈവളികെ പഞ്ചായത്തുകളെ ബന്ധിപ്പിക്കുന്ന മീയപ്പദവ് - കൊമ്മംഗല റോഡിലെ മുന്നിപ്പാടി പാലത്തിന് 15.6 കോടി രൂപയുടെ പ്രവൃത്തിയും കുണ്ടുച്ചി വിസിബി കം ബ്രിഡ്ജിനായി 99 ലക്ഷം രൂപയുടെ പ്രവൃത്തികളും പൂർത്തിയായി. ഷിറിയ അണക്കെട്ട്, കനാൽ നിർമാണത്തിനായി 2.59 കോടിയുടെ പ്രവൃത്തികളും പൂർത്തീകരിച്ചു. ഇട്ടുമ്മൽ ബല്ലാ കടപ്പുറം, പള്ളിക്കര ദാവൂദ് മഹൽ, അജാനൂർ ചാമുണ്ഡിക്കുന്ന്, പള്ളിക്കര ബിലാൽ നഗർ, നീലേശ്വരം തെരു, കാഞ്ഞങ്ങാട് ബല്ലത്ത്, പുതിയകോട്ട എന്നീ സ്മാർട്ട് അങ്കണവാടികൾക്കായി 1.75 കോടിയുടെ പ്രവൃത്തികളും പൂർത്തിയായി. മുൻ ചീഫ് സെക്രട്ടറി ഡോ. പി പ്രഭാകരൻ കമീഷൻ സമർപ്പിച്ച റിപ്പോർട്ടിന്റെ അടിസ്ഥാനത്തിൽ നിലവിൽ വന്ന പദ്ധതിയാണ് കാസർകോട് വികസന പാക്കേജ്.