കേരള ശാസ്ത്ര സാഹിത്യ പരിഷത്ത് ജില്ലാ സമ്മേളനം 25, 26 തീയതികളിൽ മടിക്കൈ കാലിച്ചാംപൊതിയിൽ നടക്കും

മടിക്കൈ: കേരള ശാസ്ത്ര സാഹിത്യ പരിഷത്ത് ജില്ലാ സമ്മേളനം 25, 26 തീയതികളിൽ മടിക്കൈ കാലിച്ചാംപൊതിയിൽ നടക്കും. 25ന് രാവിലെ കേന്ദ്ര സർവകലാശാല സ്കൂൾ ഓഫ് മെഡിസിൻ വിഭാഗം ഡീൻ പ്രൊഫ. മാത്യു ജോർജ് ഉദ്ഘാടനം ചെയ്യും.

സമൂഹത്തിന്റെ വിവിധ തലങ്ങളിൽ ശാസ്ത്രത്തിന്റെ സന്ദേശം എത്തിക്കുന്നതിനു ത്രിതല പഞ്ചായത്ത് പ്രതിനിധികൾ, വായനശാലാ - ക്ലബ്ബ് പ്രവർത്തകർ, ആരോഗ്യ പ്രവർത്തകർ, വിദ്യാഭ്യാസ പ്രവർത്തകർ, ശാസ്ത്ര പ്രവർത്തകർ,

പൊതുജനങ്ങൾ, മുഖ്യധാരാ പുരോഗമന രാഷ്ടീയ പ്രസ്ഥാനങ്ങളുടെ പ്രവർത്തകർ എന്നിവരുടെ പങ്കാളിത്തം ഉദ്ഘാടന സമ്മേളനത്തിൽ ഉറപ്പാക്കാനുള്ള പ്രവർത്തനം ആരംഭിച്ചു.

ഫെബ്രുവരി 28, മാർച്ച് 1 തീയതികളിൽ ഇടുക്കി അടിമാലിയിൽ നടക്കുന്ന അറുപത്തി മൂന്നാം സംസ്ഥാന വാർഷികത്തിന്റെ മുന്നോടിയായി നടക്കുന്ന സമ്മേളനത്തിൽ കാസർകോട്, പരപ്പ, കാഞ്ഞങ്ങാട്, തൃക്കരിപ്പൂർ മേഖല സമ്മേളനത്തിൽ നിന്ന് തെരെഞ്ഞെടുത്ത 150 പ്രതിനിധികൾ പങ്കെടുക്കും.

സമഗ്രവികസനത്തിന് ശാസ്ത്രീയ സമീപനം, വിചാരം, പഠനം, ഗവേഷണം, ജനകീയ ഇടപെടൽ എന്നിവ ശക്തിപ്പെടുത്തുന്നതിനുള്ള പ്രവർത്തനങ്ങൾക്ക് സമ്മേളനം വേദിയാകും. വിദ്യാഭ്യാസം, ആരോഗ്യസംരക്ഷണം, പരിസ്ഥിതി, സ്ത്രീസമത്വം, തൊഴിൽ, സാമൂഹ്യനീതി, ശാസ്ത്രസാങ്കേതികവിദ്യ എന്നിവയുമായി ബന്ധപ്പെട്ട വിഷയങ്ങളിൽ സെമിനാറുകളും, പ്രബന്ധാവതരണങ്ങളും, സംവാദങ്ങളും സമ്മേളനത്തിലെ വിവിധ സെഷനുകളിലായി നടക്കും. 26ന് വൈകിട്ട് സമ്മേളനം സമാപിക്കുമെന്നു സംഘാടക സമിതി ഭാരവാഹികളായ ശശീന്ദ്രൻ മടിക്കൈ, പി കുഞ്ഞിക്കണ്ണൻ അറിയിച്ചു. സമ്മേളനത്തിന്റെ വിജയത്തിന് മുഴുവനാളുകളുടെയും സഹകരണം പരിഷത്ത് ജില്ല പ്രസിഡന്റ് ബാലകൃഷ്ണൻ കൈരളിയും സെക്രട്ടറി പി പി രാജനും അഭ്യർഥിച്ചു.