കെ സി വേണുഗോപാലിനെ പിന്തുണച്ചു; സന്ദീപ് വാര്യർക്കെതിരെ തൃക്കരിപ്പൂരിൽ പ്രതിഷേധം, വാട്സ്ആപ്പ് ഗ്രൂപ്പും പിരിച്ചുവിട്ടു; വിജയാഘോഷ റോഡ് ഷോകൾ റദ്ദാക്കി

തൃക്കരിപ്പൂർ: കേരളത്തിലെ പുതിയ മുഖ്യമന്ത്രിയെക്കുറിച്ചുള്ള കോൺഗ്രസ് ഹൈക്കമാൻഡിന്റെ ചർച്ചകൾ പുരോഗമിക്കുമ്പോൾ, തൃക്കരിപ്പൂർ എംഎൽഎയായി തിരഞ്ഞെടുക്കപ്പെട്ട സന്ദീപ് വാര്യർ കെ സി വേണുഗോപാലിനെ പിന്തുണച്ചെന്ന റിപ്പോർട്ടുകൾക്ക് പിന്നാലെ മണ്ഡലത്തിൽ തന്നെ പ്രതിഷേധവും അതൃപ്തിയും ശക്തമാകുന്നു.

നീലേശ്വരം നഗരസഭ, ചെറുവത്തൂർ, കയ്യൂർ-ചീമേനി, ഈസ്റ്റ് എളേരി, വെസ്റ്റ് എളേരി, പിലിക്കോട് പഞ്ചായത്തുകളിലെ റോഡ് ഷോകൾ ഇപ്പോൾ നടത്തേണ്ടെന്ന നിലപാടിലാണെന്ന് ഒരു യുഡിഎഫ് നേതാവ് പ്രതികരിച്ചു.

തിരുവനന്തപുരത്തുനിന്ന് ഡൽഹിയിലേക്കു പോയ സന്ദീപ് വാര്യർ ചൊവ്വാഴ്ച രാവിലെയാണ് കേരളത്തിലേക്ക് മടങ്ങിയെത്തിയത്. ബുധനാഴ്ച മണ്ഡലത്തിലെത്തുമെന്നാണ് വിവരം. പ്രാദേശിക ഘടകങ്ങൾ സ്വതന്ത്രമായി സ്വീകരണ പരിപാടികൾ സംഘടിപ്പിച്ചേക്കാമെങ്കിലും സംയുക്ത റോഡ് ഷോകൾ ഉണ്ടാകില്ലെന്ന് നേതാക്കൾ വ്യക്തമാക്കി.

മുഖ്യമന്ത്രി സ്ഥാനാർഥി ചർച്ചയുമായി ബന്ധപ്പെട്ട് നേരിട്ട് പ്രതികരിക്കാൻ നേതാക്കൾ തയ്യാറായില്ലെങ്കിലും യുഡിഎഫ് പ്രവർത്തകരുടെ ഒരു വിഭാഗത്തിൽ വികാരപ്രകടനമാണ് നടക്കുന്നത്. ഹൈക്കമാൻഡ് വി ഡി സതീശന് പകരം കെ സിയെ തിരഞ്ഞെടുത്താൽ ചില പ്രതിഷേധങ്ങൾ ഉണ്ടായേക്കാം. പക്ഷേ ഇപ്പോൾ കാര്യങ്ങൾ അന്തിമമായിട്ടില്ലെന്നും മറ്റൊരു നേതാവ് പറഞ്ഞു.

സിപിഎം ശക്തികേന്ദ്രമായ തൃക്കരിപ്പൂരിൽ ചരിത്രവിജയം നേടിയാണ് സന്ദീപ് വാര്യർ ശ്രദ്ധേയനായത്. സിപിഎം ജില്ലാ സെക്രട്ടേറിയറ്റ് അംഗം വി പി പി മുസ്തഫയെ 4,431 വോട്ടിന് പരാജയപ്പെടുത്തിയാണ് അദ്ദേഹം മണ്ഡലം പിടിച്ചെടുത്തത്. യുഡിഎഫിന്റെ വോട്ട് വിഹിതം 11.22 ശതമാനം ഉയർന്ന് 48.63 ശതമാനമായപ്പോൾ എൽഡിഎഫിന്റെ വോട്ട് വിഹിതം 7.67 ശതമാനം ഇടിഞ്ഞ് 46 ശതമാനമായി കുറഞ്ഞിരുന്നു.