കെഎസ്ആര്‍ടിസിയുടെ ഉപയോഗശൂന്യമായ ബസുകള്‍ കടകളാകുന്നു

                                    

കെഎസ്ആര്‍ടിസിയുടെ ഉപയോഗശൂന്യമായ ബസുകള്‍ കടകളാകുന്നു. 92 ഡിപ്പോകളിലും ഉപയോഗ ശൂന്യമായ ബസുകള്‍ കടകളായി മാറ്റാനുള്ള നടപടി ക്രമങ്ങള്‍ ആരംഭിച്ചു. ഉപയോഗ ശൂന്യമായ ബസ് കെഎസ്ആര്‍ടിസി ഷോപ്പിന്റെ മാതൃകയില്‍ നിര്‍മ്മിച്ചു നല്‍കും. ഒരു ബസ് ഷോപ്പാക്കി മാറ്റാന്‍ 2 ലക്ഷത്തോളം രൂപ ചെലവാകുമെന്ന് അധികൃതര്‍ പറഞ്ഞു. 92 ഡിപ്പോകളിലും കാലാവധി കഴിഞ്ഞ 150 ബസുകള്‍ കടകളായി മാറ്റും. 'കെഎസ്ആര്‍ടിസി സേഫ് ടു ഈറ്റ്' എന്നാണ് പദ്ധതിയുടെ പേര്

ലേലത്തില്‍ പിടിക്കുന്ന വ്യക്തികള്‍ക്കു ഷോപ് ബസ് 5 വര്‍ഷത്തേക്കു വാടകയ്ക്ക് നല്‍കും. കാലാവധി കഴിഞ്ഞ ഒരു ബസ് ആക്രിക്കാരനു വിറ്റാല്‍ കിട്ടുന്നത് 1.5 ലക്ഷം രൂപയാണ്. ഷോപ് ബസിനു 5 വര്‍ഷത്തെ വാടക മാത്രം 12 ലക്ഷം രൂപ ലഭിക്കും. ഷോപ് ബസ് 5 വര്‍ഷത്തിനു ശേഷവും ഉപയോഗിക്കാമെന്നതാണ് പുതിയ പദ്ധതിയുടെ മെച്ചം. മില്‍മ, ഹോര്‍ട്ടികോര്‍പ്, കെപ്‌കൊ, മത്സ്യഫെഡ്, മീറ്റ് പ്രോഡക്ട്‌സ് ഓഫ് ഇന്ത്യ തുടങ്ങിയ സ്ഥാപനങ്ങളും ഉടന്‍ കെഎസ്ആര്‍ടിസി ബസുകളില്‍ വില്‍പനശാലകള്‍ തുടങ്ങും.