ബൈക്ക് അപകടത്തിൽ യുവാവും ഭാര്യാസഹോദരിയും മരിച്ചു തൃക്കരിപ്പൂർ സ്വദേശി സൂഫിയാൻ, കടവന്ത്ര സ്വദേശി മീനാക്ഷി (21) എന്നിവരാണ് മരിച്ചത്

കൊച്ചി: കുഞ്ഞിന്റെ നൂലുകെട്ട് ചടങ്ങ് ദിനത്തിൽ ഡയപ്പർ വാങ്ങാൻ പോകുന്നതിനിടയിലുണ്ടായ അപകടത്തിൽ യുവാവും ഭാര്യാ സഹോദരിയും മരിച്ചു. കാസർകോട് തൃക്കരിപ്പൂർ സ്വദേശി സൂഫിയാൻ, കടവന്ത്ര സ്വദേശി മീനാക്ഷി (21) എന്നിവരാണ് മരിച്ചത്. കൊച്ചി തോവര ലൂർദ് പള്ളിക്ക് സമീപം ഞായറാഴ്ച പുലർച്ചെ 12.30-നായിരുന്നു അപകടം.

സൂഫിയാന്റെ കുഞ്ഞിനു വേണ്ടി ഡയപ്പർ വാങ്ങാനായാണ് ഇരുവരും ഇറങ്ങിയത്. ഇരുവരും സഞ്ചരിച്ച ബൈക്ക് തൂണിൽ ഇടിച്ച് റോഡിലേക്ക് വീഴുകയായിരുന്നു. ​ഗുരുതരമായി പരുക്കേറ്റ ഇരുവരും സംഭവ സ്ഥലത്ത് വച്ചു തന്നെ മരിച്ചു. ഇടിച്ച ബൈക്ക് സമീപത്ത് പാർക്ക് ചെയ്തിരുന്ന വാഹനങ്ങളിലേക്കായിരുന്നു വീണത്.

ബൈക്ക് സൂഫിയാന്റെ സുഹൃത്തിന്റെതായിരുന്നു. ആഷിഖാണ് സൂഫിയാന്റെ പിതാവ്. ഭാര്യ: മാളവിക. മീനാക്ഷിയുടെ അച്ഛൻ രാജു.