ആൾക്കാർ നോക്കി നിൽക്കെ യുവാവ് കിണറിൽ ചാടി മരിച്ചു ചീമേനി ചെമ്പ്രകാനത്താണ് സംഭവം

ചീമേനി  : ആൾക്കാർ നോക്കി നിൽക്കെ യുവാവ് എലിവിഷം കഴിച്ച ശേഷം കിണറിൽ ചാടി മരിച്ചു. ചീമേനി പൊലീസ് സ്റ്റേഷൻ പരിധിയിലെ ചെമ്പകാനത്തെ അനീഷ് (36) ആണ് ജീവനൊടുക്കിയത്. തിങ്കളാഴ്ച രാത്രി 12 മണിയോടെയാണ് സംഭവം. ഇയാൾ വീട്ടിൽ ബഹളം വയ്ക്കുന്നുവെന്ന വിവരമറിഞ്ഞ് തിങ്കളാഴ്ച വൈകുന്നേരം പൊലീസ് സ്ഥലത്തെത്തി അനീഷിനെ താക്കീത് ചെയ്തിരുന്നുവെന്നു പറയുന്നു. രാത്രിയോടെ വീണ്ടും അക്രമോത്സുകനാവുകയും ബഹളം വയ്ക്കുകയുമായിരുന്നുവെന്നു പറയുന്നു. തുടർന്നാണ് ആൾക്കാർ നോക്കി നിൽക്കെ കിണറ്റിൽ ചാടിയത്. വിവരമറിഞ്ഞ് ഫയർഫോഴ്സ് എത്തി ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല. അനീഷിനെ നേരത്തെ ഡിഅഡിക്ഷൻ സെന്ററിൽ പ്രവേശിപ്പിച്ചിരുന്നുവെന്നു പൊലീസ് വൃത്തങ്ങൾ പറഞ്ഞു. ബാബു-മാധവി ദമ്പതികളുടെ മകനാണ്. ഭാര്യ: ശ്രീതു. മക്കൾ: ആദ്യദേവ്, സൂര്യദേവ്, കാശിദേവ്. സഹോദരി: നിഷ.
സംഭവത്തിൽ ചീമേനി പൊലീസ് അസ്വാഭാവിക മരണത്തിനു കേസെടുത്തു. മൃതദേഹം ജില്ലാ ആശുപത്രി മോർച്ചറിയിൽ.