നാടൻ തോക്കും വെടിയുണ്ടകളുമായി യുവാവിനെ അറസ്റ്റു ചെയ്തു

പയ്യന്നൂർ: നാടൻ തോക്കും 13 വെടിയുണ്ടകളുമായി യുവാവിനെ അറസ്റ്റു ചെയ്തു. കുടിയാന്മല, കൊക്കമുള്ളിൽ, എൽദോ ഏലിയാസി(38)നെയാണ് കുടിയാന്മല ഇൻസ്പെക്ടർ എം എൻ ബിജോയിയും സംഘവും അറസ്റ്റു ചെയ്തത്. ഇയാൾ സ്ഥിരമായി നായാട്ട് നടത്തുന്നതായി ജില്ലാ പൊലീസ് മേധാവിയുടെ സ്ക്വാഡിനു വിവരം ലഭിച്ചിരുന്നു. ഇതേ തുടർന്ന് ചൊവ്വാഴ്ച രാത്രി ഏഴരമണിയോടെ വീട്ടിൽ റെയ്ഡ് ചെയ്താണ് കിടപ്പുമുറിയിൽ സൂക്ഷിച്ചിരുന്ന ഒറ്റക്കുഴൽ നാടൻ തോക്കും വെടിയുണ്ടകളും പിടികൂടിയത്.അങ്കമാലി സ്വദേശിയായ ഇയാൾ നേരത്തെ കുവൈത്തിൽ നഴ്സായി ജോലി ചെയ്തിരുന്നു. പിന്നീട് കുടിയാൻമലയിൽ വീടു പണിത് സ്ഥിരം താമസം ആരംഭിക്കുകയായിരുന്നു. കോടതിയിൽ ഹാജരാക്കിയ പ്രതിയെ രണ്ടാഴ്ചത്തേയ്ക്ക് റിമാന്റു ചെയ്തു.