പടക്കം പൊട്ടിച്ചതിലുള്ള വിരോധം ; മാരകായുധങ്ങളുമായി എത്തിയ സംഘം നാലു പേരെ വെട്ടി പരിക്കേൽപ്പിച്ചു

കാസർകോട്: പടക്കം പൊട്ടിച്ചതിലുള്ള വിരോധം മൂലമാണെന്നു പറയുന്നു, മാരകായുധങ്ങളുമായി എത്തിയ സംഘം നാലു പേരെ ആക്രമിച്ചു. കുത്തും വെട്ടുമേറ്റ പരിക്കുകളോടെ നാലു പേരെ ആശുപത്രിയിൽ പ്രവേശിപ്പിച്ചു. ചെങ്കള, സിറ്റിസൺ നഗർ ഫയാസ് വില്ലയിലെ ഇബ്രാഹിം സൈനുദ്ദീൻ (62), മകൻ ഫവാസ് (20), ബന്ധുക്കളായ റസാഖ് മുഹമ്മദ് (50), മുനീഷ് ടിഎം (28) എന്നിവർക്കാണ് പരിക്കേറ്റത്. ഇവരിൽ ഗുരുതരമായി പരിക്കേറ്റ ഫവാസിനെ മംഗ്ളൂരുവിലെ സ്വകാര്യ ആശുപത്രിയിലും മറ്റുള്ളവരെ ചെങ്കളയിലെ നായനാർ ആശുപത്രിയിലും പ്രവേശിപ്പിച്ചു. സംഭവത്തിൽ മൂന്നു പേരെ വിദ്യാനഗർ പൊലീസ് കസ്റ്റഡിയിലെടുത്തു ചോദ്യം ചെയ്യുന്നു.

ഞായറാഴ്ച രാത്രി 11 മണിയോടെയാണ് അക്രമ സംഭവം നടന്നത്. പ്രതികൾ നേരത്തെ പടക്കം പൊട്ടിച്ചത് ചോദ്യം ചെയ്ത വിരോധത്തിൽ കത്തിയും വടിവാളുമായി എത്തിയ പത്തംഗ ടിക്കുകയായിരുന്നുവെന്നു വിദ്യാനഗർ പൊലീസ് രജിസ്റ്റർ ചെയ്ത കേസിൽ പറയുന്നു. അബ്ദുൽ ഖാദർ എന്ന ചെന്നു, അഞ്ജു, മുള്ളു, മൊയ്തീൻ, നാഫിസ് തുടങ്ങിയവർക്കും കണ്ടാലറിയാവുന്ന അഞ്ചു പേർക്കുമെതിരെ വധശ്രമത്തിനാണ് പൊലീസ് കേസെടുത്തിട്ടുള്ളത്.