പൊട്ടിവീണ വൈദ്യുതി കമ്പിയിൽ നിന്നും ഷോക്കേറ്റ് കർഷകന് ദാരുണാന്ത്യം

കാസർകോട്: പൊട്ടിവീണ വൈദ്യുതി കമ്പിയിൽ നിന്നു ഷോക്കേറ്റ് കർഷകന് ദാരുണാന്ത്യം. ചെമ്മനാട്, കോളിയടുക്കം വയലാംകുഴി പഞ്ചിലാങ്കൽ വയലിലാണ് സംഭവം. ക്ഷീര കർഷകനായ വയലാംകുഴിയിലെ മേലത്ത് കുഞ്ഞുണ്ടൻ നായർ(75)ആണ് മരിച്ചത്. സമീപത്ത് പശുവിനെയും ഷോക്കേറ്റ് ചത്ത നിലയിൽ കാണപ്പെട്ടു. തിങ്കളാഴ്ച രാവിലെ വീടിനു സമീപത്തെ വയലിൽ പശുവിനെ കെട്ടാൻ പോയതായിരുന്നു കുഞ്ഞുണ്ടൻ നായർ. ഏറെ നേരം കഴിഞ്ഞിട്ടും തിരിച്ചെത്താത്തതിനെ തുടർന്ന് അന്വേഷിച്ചു പോയപ്പോഴാണ് ദാരുണമായ സംഭവം ശ്രദ്ധയിൽ പെട്ടത്.